Дьокуускайга Кыайыы болуоссатыгар тыһыынчанан киһи “Өйдөбүнньүк чүмэчитэ” аахсыйаҕа кытынна

Эйэлээх олох туһугар Ийэ дойдубутун көмүскүү барбыт, сэрии толоонуттан эргиллибэтэх Аҕа дойду Улуу сэриитин кыттыылаахтарын чиэстиир үгэскэ кубулуйбут тэрээһин Дьокуускайга Кыайыы болуоссатыгар буолла.

РФ Үөрэҕириитин миниистирэ Сергей Кравцов: “Бүгүн бигиһи Ийэ дойдубут туһугар олохторун толук уурбуттары, фашизмы, нацизмы кыайбыттары,эйэлээх олох туһугар охсуспуттары өйдүүбүт-саныыбыт. Кинилэр Улуу Кыайыыга сирдээбит хорсун быһыыларын хаһан даҕаны умнуохпут суоҕа. Саамай сүрүн бырааһынньыкка көрсүөхпүт – Ыам ыйын 9 күнүгэр. Дойдубут бырааһынньыгар, Аҕа дойду сэриитигэр Улуу Кыайыы күнүгэр. Сэрии, тыыл бэтэрээннэрин өйдүү-саныы сылдьыаҕыҥ уонна хаһан даҕаны устуоруйаны умнумуоҕуҥ”, – диэн эттэ.

Ил Дархан Айсен Николаев элбэх омуктаах Сэбиэскэй норуот кыайыытын уһансыбыттары, олохторун толук уурбуттары кэриэстээн муһуннубут диэн бэлиэтээтэ. “Биһиги аҕыйах ахсааннаах Сахабыт сириттэн фроҥҥа 62 тыһ. тахса киһи ыҥырыллыбыта. 32 тыһ. тахса киһи кыргыһыы хонуутугар хаалбыта. Тыылга уонунан тыһыынча киһи өлбүтэ. Кинилэр олохторун толук ууран Улуу Кыайыы ситиһиллибитэ. Биһиги ол Улуу Кыайыы туһунан умнуо суохтаахпыт.

Манна, Кыайыы болуоссатыгар тыһыынчанан мустубут эдэр дьону көрөн, уоттаах сэрии кыттыылаахтарын өйдөөн-санаан чүмэчи уура кэлэр дьон баарын тухары биһиги дойдубут өрүү кыайыылаах-хотуулаах тахсарыгар эрэнэбин. Ким да умнуллубат! Туох да умнуллубат!” – диэн эттэ.

Тустаах тэрээһин номнуо уонтан тахса сыл ыытыллар. Сыллата тыһыынчанан ыччат, орто, саастаах, кырдьаҕас дьон ол уоттаах сэриигэ охтубуттары, кыайыылаахтары кэриэстээн мустар.

Аҕа дойду Улуу сэриитин устуоруйата тыыннаах – ыччат өйдүүрүн тухары, чулуу бэтэрээннэрбит тыыннаахтар – биһиги кэриэстиирбит тухары!