Дьокуускайга Кыайыы пааркатыгар сибэкки дьөрбөтүн уурдулар

Бүгүн, дойду сүрүн бырааһынньыгын көрсө, Дьокуускайга Кыайыы пааркатыгар сибэкки дьөрбөтүн ууруу сиэрэ-туома ыытылынна.

Кыттааччылар олохторун толук уурбут буойуттары ытыктаан биир мүнүүтэ саҥарбакка турдулар, Кыайыы стелатыгар, саха снайпера Иван Кульбертинов уонна Кыайыылаах саллаат дьиэ кэргэнэ пааматынньыктарыгар сибэкки дьөрбөтүн уурдулар.

Тэрээһиҥҥэ Саха сирин бырабыыталыстыбатын чилиэттэрэ, дьокутааттар, бэтэрээннэр, оскуола үөрэнээччилэрэ уонна уопсастыбанньыктар кыттыыны ыллылар. Саха сирин Ил Дархана Айсен Николаев уонна салалтатын аатыттан Кыайыы күнүн көрсө Саха сирин Бырабыыталыстыбатын бэрэссэдээтэлин солбуйааччы Георгий Степанов эҕэрдэлээтэ.

«Бэтэрээннэрбитигэр аныгыс Кыайыы 80 сыллаах үбүлүөйүн көрсөргүтүгэр баҕарабын. Бүгүн Саха сиригэр ыытыллар бары тэрээһиннэр бу улуу даатаҕа бэлэмнэнии үлэтэ буолар. Бу күннэргэ Ил Дархан Ыйааҕынан Аҕа дойду Улуу сэриитин кыттыылаахтарыгар 1-дии мөл. солк. биир кээмэйдээх анал төлөбүрдэри олохтоото.  Бэтэрээннэрбитигэр саамай улахан махталбыт, ытыктабылбыт, сүгүрүйүүбүт инникибитигэр буолуоҕа», — диэтэ Георгий Степанов.

Үөрүүлээх тэрээһиҥҥэ Ил Түмэн Билимҥэ уонна үөрэххэ кэмитиэтин бэрэссэдээтэлэ Антонина Григорьева, Дьокуускай мэра Евгений Григорьев, Дьокуускай куорат Дууматын бэрэссэдээтэлэ Альберт Семенов, ону тэҥэ Гагарин аатынан уокурук бэтээрээннэрин Сэбиэтин бэрэссэдээтэлэ Александр Архипов тыл эттилэр.

Санатан эттэххэ, «Кыайыы паарката» диэн саҥа уопсастыбаннай киэҥ-куоҥ киин куорат паарката 2020 сыл балаҕан ыйыгар Дьокуускай куорат төрөөбүт күнүгэр аһыллыбыта. Бу сиргэ стеланы туруорууттан Кыайыы пааркатын тупсарыыта саҕаламмыта.

Кыайыы паарката Аҕа дойду Улуу сэриитин кыттыылаахтарыгар, тыылга үлэлээбит улахан дьоҥҥо уонна оҕолорго хорсун быһыыларын харыстыырга анаан тутуллубута.