Дьокуускайга “Кыайыы вальса” бальнай үҥкүү бэстибээлэ ыытылынна

Дьокуускай куоракка “Кыайыы вальса”  диэн бальнай үҥкүүнү толорооччулар өрөспүүбүлүкэтээҕи ХIII бэстибээллэрэ  буолан ааста.

Бүлүү улууһун оройуонааҕы сэбиэтин дьокутаата, КП Бүлүүтээҕи салаатын райкомун 1 сэкирэтээрэ, Бүлүү куоратын, Бороҕон нэһилиэгин  бочуоттаах олохтооҕо, өрөспүүбүлүкэҕэ ыытыллыбыт “Бизнес Леди», «Дьахталлар хамсааһыннарын лиидэрэ», «Экстрим Леди» күрэхтэр анал ааттарын  хаһаайката Тамара Васильевна Фомина-Талбаана Ай бэстибээл туһунан бэйэтин санаатын үллэһиннэ.

— Дьокуускай куоракка ыытыллыбыт бэстибээл сэрии, үлэ бэтэрээннэрин уопсастыбатын бэрэссэдээтэлэ  Вильям Очирович Иванов эҕэрдэтинэн саҕаланна.

Үгэс буолбут «Кыайыы вальса» бальнай үҥкүү 13-с  төгүлүн ыытыллар бэстибээлин  күрэҕэр Бүлүүттэн салайааччыбытын кытары 13 буолан кытынныбыт. Алта паара араас категорияҕа  кыттан,  барытыгар финалга тахсан,  1 миэстэттэн 6-с миэстэҕэ тиийэ кыайыылаах үктэлигэр  үктэннибит. Урукку сыллартан уратыта диэн, уон үс сыл устата элбэх ситиһиилээх кыттааччыларга, оҕолортон саҕалаан улахан дьоҥҥо анал суруктары, бириистэри туттаран,  дьоһуммутун өрө көтөхтүлэр. Ол курдук,  бөлөхтөн  Дьиэ, уот, коммунальнай хаһаайыстыба бэтэрээн үлэһитэ  Константинов Николай Васильевич соторутааҕыта Украинаҕа анал дьайыыга сылдьан кэлбит, саҥа дьарыктанан эрэ уолбутугар эҕэрдэ, махтал сурук туттарда. 13 сыл тиһигин быспакка 17-с кыайыытын ситиспит бөлөх старостатыгар Тамара Васильевна Фоминаҕа эмиэ махтал суругун туттардылар.

Биһиги үҥкүүбүт бөлөҕүн  СӨ  култууратын үтүөлээх үлэһитэ Светлана Ефимовна Зинурова үҥкүүгэ дьарыктаан салайан илдьэ сылдьар. Бу маннык үрдүк таһымнаах  күрэхтэргэ уон үс сыл устатын тухары үөрэтэн-такайан, араас мэһэйдэри туоратан илдьэ сылдьарыгар махталбыт улахан.  Чахчы да,  бу күрэххэ сылдьан тутум үрдээн, олоххо тапталбыт күүһүрдэр күүһүрэн иһэр уонна сылы быһа манна кыттаары,  баҕа санааларбытын толороору бэлэмнэнэбит. Үрдүк таһымнаах М. З. Сивцев салайар «Мозаика», В. С.Парников «Кыталыгын» кытта бииргэ кэккэлэһэ хамсана сылдьарбытыттан астына үөрэбит. Холобур ылан киэн туттабыт.

Бөлөхпүтүгэр икки дьиэ кэргэн  тэҥҥэ сылдьыһар. Раиса, Василий Петровтар Бөтүҥтэн суол алдьанар диэри киирэн,  төһө да сүөһүлээх, сылгылаах буоллаллар,  сүрэх баҕатын толорон, быыс-арыт булан дьарыктанан, быйыл толору кыайыылаах буоллулар. Светлана, Николай куоракка олорон дьарыктанан хаһыс да сылларын кыайыыны ситистилэр.

Бэтэрээн  үҥкүүһүттэрбит Егор Рожин, Светлана Павлова иккиэн хомуньуустар. Бөлөхпүтүгэр барыта алта хомуньуус баар. Биһиги «Кыайыы вальсын» кыайыылаахтара буолан, араас тэрээһиннэри тэрийсэбит даҕаны,  кыттабыт даҕаны.  «Бары бииргэ! » аахсыйаҕа-сотору сотору харчынан көмөлөһөбүт.

Саамай кырдьаҕаспыт Анатолий Николаевич Софронеев быйыл 81-с хаарын уулларан сылдьар. Ыраах айаҥҥа сылдьыспатар да,  куруук кэпсэтэн сүбэлиир-амалыыр, ситиһиилэрбититтэн үөрэн эҕэрдэлиир. Аан бастаан кинилиин Дора Павловна Филиппова сылаас илиититтэн туппут кыһыл көмүс мэтээлбитин санатан долгутан ылар. «Куруук кэлэн кыттар буолуҥ!» диэн  эппитин ылынан,   иккиэн уон сыл кыттан, араас  кубоктаахпыт. Бэйэм саастыы Г. П. Харлампьевтыын Казань, Санкт Петербург куораттарга аан дойдутааҕы норуоттар бэстибээллэригэр кыттан, I истиэпэннээх лауреат буолбуппут. Куорат сэбиэтигэр дьокутааттыы сылдьан,  «Дьол вальса» бырайыак тэринэн, ол чэрчитинэн Бүлүү бөлөхтөргө «Ньургуһун вальса», «Бүлүү вальса», «Кырдьыбат вальс» диэн эригийиэннээҕи  күрэхтэри тэрийбитим. Оскуолам үбүлүөйүгэр  «Учуутал вальсын» ыыппытым. Ити барыта «Кыайыы вальса» күрэххэ кыттарбар саҕыллан тахсыбыта.