Дьокуускайга кырдьаҕастар уонна инбэлииттэр интэринээт-дьиэлэригэр өрөмүөн оҥоһуллуо

В.П. Решетников аатынан Өрөспүүбүлүкэтээҕи кырдьаҕастар уонна инбэлииттэр интэринээт-дьиэлэрин саҥардыыга анаан СӨ Бырабыыталыстыбатын бэрэссэдээтэлин бастакы солбуйааччы Дьулустаан Борисов мунньаҕы ыытта.

Бу интэринээт-дьиэҕэ эбии 200 миэстэлээх олорор дьиэни сыһыары тутуохтара диэн СӨ Баһылыгын уонна Бырабыыталыстыбатын пресс-сулууспата иһиттннэрэр.

Эбийиэги саҥардыы үлэтэ кэлэр сылтан федеральнай бүддьүөттэн кыттыгас үбүлээһин көмөтүнэн саҕаланара былааннанар.

«Өрөспүүбүлүкэтээҕи кырдьаҕастар уонна инбэлииттэр интэринээт-дьиэлэрин саҥардыы олус улахан суолталаах. Саҥардыллыбыт дьиэ  манна олорор дьоҥҥо табыгастаах эйгэни үөскэтиэҕэ. Ыытыллар үлэ кырдьаҕастар уонна доруобуйаларынан хааччахтаах дьон наадыйыыларын учуоттаан, барыта аныгы стандартарка эппиэттиир гына оҥоһуллуоҕа», — диэн бэлиэтээтэ Дьулустан Борисов.

Мунньах кэмигэр Дьулустаан Борисов интэринээти саҥардыыга бырайыактыыр-сметнай докумуоннары көрүү үлэтин түргэтэтэр соругу туруорда.

СӨ Үлэҕэ уонна социальнай сайдыыга министиэристибэтигэр эбийиэги саҥардыы үлэтин үбүлүүргэ РФ Үлэҕэ уонна социальнай көмүскэлгэ министиэристибэтин кытта сөбүлэһии түһэрсэр үлэни тэрийэргэ сорудахтаатылар.

Үс этээстээх интэринээт-дьиэтэ, 1988 сыллаахха тутуллубут уонна Саха сиригэр саамай улаханынан биллэр – уопсай иэнэ 5,6 тыһ. кв. миэтэрэ. Эбийиэк тутуллуоҕуттан хапытаалынай өрөмүөн оҥоһулла илик.