Дьокуускайга кыргыттар дьиэ кыылыгар хаҕыс сыһыан иһин сууттаннылар

Дьокуускай куорат борокуратуурата икки кыыска сыһыаннаах холуобунай дьыалаҕа судаарыстыбаннай буруйдааһыны өйөөтө.

Кинилэр РФ Холуобунай кодексын 245-с ыстатыйатын 2-с чааһын «а, в» пууннарынан (кыылга ыар сыһыан) суутаннылар. Бу туһунан СӨ Борокуратууратын пресс-сулууспата иһитиннэрэр.

Суут кэмигэр быһаарыллыбытынан, 2024 сыл муус устар ыйыгар сууттанааччылар биллэриинэн куосканы ылбыттар, ол кэннэ Дьокуускай куорат биир кыбартыыратыгар кыылы полипропилен мөһөөччүккэ укпуттар. Онтон утуу-субуу моонньуттан ыга тутан, салгынын бүөлээбиттэр, тимир биитэнэн охсубуттар уонна быһаҕынан хаста да  анньыбыттар, ону таһынан  буола турар быһыыны барытын видеоҕа устубуттар.

Сууттанааччылар оҥорбут буруйдарын толору билиммиттэр. Суут кыргыттары, 3 сылга уонна 3 сыл 1 ыйга болдьоххо көҥүллэрин быһарга уураахтаата уонна хас биирдиилэригэр 3 сыллаах тургутан көрүү болдьоҕу анаата. Уураах сокуоннай күүһүгэр киирэ илик.