Киин куоракка кыыс оҕону ыт ытырбытынан холуобунай дьыала тэриллиэҕэ

РФ Силиэстийэлиир кэмитиэтин бэрэссэдээтэлэ Александр Бастрыкин Дьокуускайга 14 саастаах кыыс оҕону ыт ытырбытынан холуобунай дьыаланы тэрийэргэ сорудахтаата. Бу туһунан Силиэстийэлиир кэмитиэтин информационнай киинигэр иһитиннэрдилэр.

Быһылаан быйыл саас буолбута эрээри, төрөппүттэр оҕолорун ыт ытырбытынан  буруйдааҕы булбатахтар. Бастрыкиҥҥа эмсэҕэлээбит оҕо аҕата көрдөһүүлээх тахсыбыт. Кыыс оҕо аҕата  кэпсээбитинэн, муус устар ыйга киин куорат Марха түөлбэтигэр чааһынай ыалтан тахсыбыт ыт оҕоҕо саба түспүт. Быһылааны ааһан иһэр киһи ыты үүрэн тохтоппут. Бу кэннэ оҕо элбэх бааһырыылаах балыыһаҕа киллэриллибит.

Ыт хаһаайкатын эппиэтинэскэ тардаары суут уорганнарыгар үҥсүү суруктар  ыытыллыбыттар эрээри, туох да түмүгү аҕалбатах. «Силиэстийэлиир кэмитиэтин бэрэссэдээтэлэ Александр Иванович Бастрыкин СӨ Силиэстийэлиир кэмитиэтин сүрүн управлениетын салайааччытыгар Виталий Викторович Кондратенкоҕа холуобунай дьыала тэрийэн, дьыала хаамыытын уонна түмүгүн туһунан дакылаат оҥорорго сорудахтаата», — диэн СК иһитиннэриитигэр этиллэр. Сорудах толоруута киин аппараат хонтуруолугар ылылынна.