Дьокуускайга Ленин болуоссатыгар биир сэргэ алмааһа алдьаммыт

Дьокуускайга Ленин болуоссатыгар биир саҥа сэргэ алмааһа икки аҥыы арахсан алдьанна.

Ил Дархан иһинэн тэриллибит Архитектура уонна градостроительство управлениетыгар иһитиннэрибиттэринэн, сэргэ алмааһын кыраан таарыйбыт, түмүгэр саҥа сэргэ алмааһа икки аҕыы арахсан алдьаммыт.

«Сэргэлэри ыраастыыр үлэ кэмигэр кыраан биир сэргэ алмааһын таарыйбытыгар алдьаммыт. Бэдэрээтчит «Сэргэ» ГК  алдьаммыт сэргэ элэмиэнин көтүрэн уларытыаҕа. Саҥа алмаас мэктиэ үлэ чэрчитинэн оҥоһуллуоҕа.

Бу быһылаан Ленин болуоссатын официальнай аһыллыытын сиэригэр-туомугар сабыдыаллаабатын бэлиэтиир наадалаах Аһыллыы сиэрин-туомун күнэ быһаарыллар. Бу туһунан эбии иһитиннэриэхпит», – диэн биэдэмистибэ пресс-сулууспата иһитиннэрдэ.

Санатан эттэххэ, Ленин болуоссатын саҥардыы үлэтэ, урут былааннаммытын курдук, алтынньыга түмүктэниэҕэ.