Дьокуускайга Ленин проспегар тахсыбыт баһаар бэрэбиэркэтин түмүгэ таҕыста

Бу күһүн Дьокуускай куорат Ленин проспегын, 3/1 г дьиэтигэр хас да киһи эчэйиилээх, өлүүлээх баһаар тахсыбыта. Бүгүн СӨ Борокуратуурата бу баһаар тахсыбыт чахчытынан бэрэбиэркэ түмүгүн таһаарда. Бу туһунан СӨ Борокуратууратын пресс-сулууспата иһитиннэрэр.

СӨ Борокуратуурата Дьокуускай куорат Борокуратууратыгар Ленин проспегын, 3/1г административнай дьиэтигэр баһаар тахсыбыт биричиинэтин быһаарарга сорудахтаабыта.

Биллибитин курдук, бу сэттэ этээстээх административнай дьиэ 1985 с. тутуллан үлэҕэ киирбит. Дьиэни бас билээччинэн «Сигма» ХЭУо буолар. Улахан баһаар түмүгэр 11 киһи эчэйбит, икки 1993 с. төрүөх эдэр дьахтар балыыһаҕа киирэн баран тыыннара быстыбыт.

Дьокуускай куорат Борокуратуурата миэстэтигэр тиийэн бэрэбиэркэлээбитин түмүгэр, баһаартан сэрэхтээх буолуу ирдэбиллэригэр элбэх кэһиилэр бааллара быһаарылыннылар, ол иһигэр автоматическай сигнализация үлэлээбэтэ, эвакуационнай тахсар сири бүөлээһин, баһаарынай аан мэхэньиисимэ үлэлээбэтэ уо.д.а. Харабыллыыр өҥөнү оҥорор тэрилтэ үлэтигэр эмиэ кэһиилэр бааллара биллибит, холобур, харабыллыыр анал үөрэҕэ суох киһини үлэлэтэ сылдьыбыт, ону таһынан атын кэһиилэр да бааллара быһаарылылбыт.

Баһаар тахсыбыт чахчыларынан кэһиилэргэ барытыгар борокуруор дьаһаллары ылынна. РФ ХК 109 ыст. Сэлиэстийэлиир уорганнарынан тэриллибит холуобунай дьыала СӨ Борокуратууратын хонтуруолугар тутуллар.