ВИДЕО: Хаҥаласка массыынанан сылгы үөрүн түҥнэри көппүттэр

Хаҥалас улууһугар массыынанан сылгы үөрүн түҥнэри көппүттэр.

Массыына түргэн тэтимнээхтик айааннаан иһэн, «Умнас» федеральнай суол 55-с килэмиэтиригэр сылгы үөрүгэр кэтиллибит. Саахалга биир сылгы өлбүт, оттон массыына бэйэтэ суолтан туора көппүт. Бу туһунан Саха сиринээҕи Госавтоинспекция пресс-сулууспата иһитиннэрдэ.

Суол  быһылаана от ыйын 10 күнүгэр түүн үөһүн саҕана Хаҥалас улууһун Уулаах-Аан сэлиэнньэтин таһыгар буолбут. «Mazda CX-5» мааркалаах массыына уруулугар 33 саастаах дьахтар олорбут.

«Кини суол усулуобуйатыгар сөп түбэһэр тэтимин тутуспакка, сылгы үөрүн түҥнэри көппүт», — диэн Госавтоинспекция пресс-сулууспата суруйар.

Биэдэмистибэ иһитиннэрэринэн, дьахтар арыгы испэтэх, быһылаан түмүгэр эчэйбэтэх. Массыына солуонугар кинини кытта кэргэнэ уонна оҕото бааллар эбит. Кинилэр эмиэ эчэйбэтэхтэр.

«Суоппар РФ Административнай Кодексатын 12.15 ыстатыйатын 1-гы чааһынан административнай эппиэтинэскэ тардылынна. Быһылаан туохтан-хайдах тахсыбыта быһаарыллар, административнай силиэстийэ анаммыт», — диэн Госавтоинспекцияҕа эбэн эппиттэр.