Дьокуускайга Маай бырааһынньыгар үлэ дьонун чиэстээтилэр

Дьокуускайга ыам ыйын 1 күнүгэр, Саас уонна үлэ бырааһынньыгар, Доҕордоһуу болуоссатыгар бочуоттаах үлэһиттэр, бэтэрээннэр, уһуйааччылар, «Үлэ киһитэ» бириэмийэ лауреаттара, үлэ династияларын бэрэстэбиитэллэрэ муһуннулар.

Ол Курдук, бу күн киин куоракка «Трудовая Слава Якутии» тэрээһин буолан ааста. Өрөгөйдөөх тэрээһиҥҥэ кыттааччылар ортолоругар тыа хаһаайыстыбатыгар 861 сыл үлэлээбит Васильевтар династиялара, сир үлэтигэр уопсай  539 сыл  ыстаастаах Пермяковтар династиялара, доруобуйа харыстабылыгар Рожиннар династиялара толору 507 сыл үлэ ыстаастаахтар, Гуляевтар династиялара үөрэх эйгэтигэр 446 сыл устата  үлэлээбиттэр. Ону кытта өрөспүүбүлүкэ култууратыгар 310 сыл үлэлээбит Габышевтар династиялара кэлбиттэр, оттон Кычкиннар династиялара доруобуйа харыстабылыгар 245 сыл үлэлээбиттэр.

«Бүгүн манна биһиги убаастабыллаах бэтэрээннэрбит кэлэн олороллор. Кинилэр хас биирдиилэрэ Саха сирин сайдыытыгар ураты кылааттарын киллэрбиттэрэ. Уонна хас биирдиилэрин өр сыллаах сыралаах үлэлэрэ, дойдуга, норуокка тапталлара, ситиһиилэрэ түмэр», — диэтэ СӨ Ил Дарханын уонна Бырабыыталыстыбатын дьаһалтатын салайааччыта Георгий Михайлов.

Өрөспүүбүлүкэ идэлээх сойуустарын Федерациятын бэрэссэдээтэлэ Николай Дегтярев эмиэ Саха сирин олохтоохторугар, үлэ кэлэктииптэригэр уонна тэрилтэлэригэр анал байыаннай дьайыыга сылдьар байыастарга көмөлөрүн иһин махталын биллэрдэ.

Киин куорат олохтоохторун сааскы бырааһынньыгынан Дьокуускай куорат мээрэ Евгений Григорьев уонна Өрөспүүбүлүкэ сэрии, үлэ, сэбилэниилээх күүстэр уонна быраабы араҥаччылыыр уорганнар бэтэрээннэрин уопсастыбаннай тэрилтэтин Сэбиэтин бэрэссэдээтэлэ Вильям Иванов эҕэрдэлээтилэр.

Бу күн судаарыстыбаннай наҕараадалар туттарылыннылар — «СӨ тыатын хаһаайыстыбатын үтүөлээх үлэһитэ» бочуоттаах ааты «Ким» бааһынай хаһаайыстыба баһылыга Валерий Владимирович Ким ылла, оттон «Саха Республикатын үтүөлээх тутааччыта» ааты СӨ судаарыстыбаннай сакаасчытын сулууспатын отделын начаалынньыгын солбуйааччыта Юрий Петуховка иҥэрдилэр.

Ону тэҥэ СӨ баһылыгын грамоталара уонна «Гражданскай килбиэн» туйгун бэлиэлэрэ туттарылыннылар. Саас уонна үлэ бырааһынньыгынан Ил Түмэн бэрэссэдээтэлин солбуйааччы Афанасий Владимиров эҕэрдэлээтэ. Тэрээһин оһуохайынан уонна кэнсиэринэн түмүктэннэ.