Дьокуускайга массыынанан икки оҕону түҥнэри көппүттэр

Ааспыт сууккаҕа Дьокуускайга 9 суол саахала тахсыбыта бэлиэтэннэ, онно үс киһи эмсэҕэлээбит. Бу туһунан киин куорат Госавтоинспекцията иһитиннэрэр.

Атырдьах ыйын 4 күнүгэр, киэһэ 16:00 чаас саҕана, Авиатордар уулусса 1 №-дээх дьиэтин аттыгар «Lexus RX350» массыына 27 саастаах суоппара 9 саастаах бэлисипиэттээх оҕону түҥнэри көппүт.

Салгыы киэһэ 18:00 чаас саҕана Полина Осипенко уулусса 5А №-дээх дьиэтин аттыгар «Toyota Premio» массыына 33 саастаах суоппара суолу туораан иһэр 9 саастаах оҕону түҥнэри көппүт.

Петр Алексеев уонна Поярков уулуссалар быһа охсуһууларыгар «Toyota Crown» массыына 26 саастаах суоппара суолу туораан иһэр 88 саастаах киһини түҥнэри көппүт.

Бу быһылааннар түмүктэригэр сокуоннай саастарын ситэ илик оҕолор уонна аҕам саастаах киһи араас эчэйиилэри ыллылар. Бу чахчыларынан бэрэбиэркэ ыытыллар.

Госавтоинспекция сулууспата суоппардары суолга болҕомтолоох буоларга ыҥырар. Оскуолалар, оҕо уһуйааннарын, оонньуур былаһааккалар аттыларыгар, ол эбэтэр оҕолор баар буолуохтарын сөптөөх сирдэригэр, ордук сэрэхтээх буолар ирдэнэр.