Дьокуускайга Михаил Николаев аатынан болуоссат баар буолуоҕа

Дьокуускайга Октябрьскай уулуссатыгар үлэлии турар автовокзалы сабан баран, ол миэстэтигэр бастакы бэрэсидьиэн Михаил Николаев аатынан болуоссаты тутарга былаанныыллар. Ол туһунан куорат мээрэ Евгений Григорьев пресс-кэмпириэнсийэҕэ иһитиннэрдэ.

Бу иннинэ мээр Евгений Григорьев үлэлии турар автовокзалы сабан баран, аэропорт уонна Гимеин оройуонугар, Национальнай мэдиссиинэ киинин аттыгар икки автовокзалы тутар былаан баарын туһунан этэн турар.

— Мин саҥа тутуллар болуоссакка Михаил Ефимович Николаев аатын иҥэрэр туһунан идиэйэни көҕүлээтим. Бу эбийиэк тулатын үчүгэйдик оҥорон баран, бастакы бэрэсидьиэн пааматынньыгын туруорар баҕалаахпыт. Куорат киинигэр маннык улуу киһиэхэ сөптөөх киэҥ-куоҥ, атын былаһаакка суох даҕаны диэххэ сөп, — диэн Евгений Григорьев эттэ.