Дьокуускайга Михаил Николаевка аналлаах “Азия оҕолоро – устуоруйаттан идиэйэҕэ” быыстапка салгыы үлэлиир

“Арассыыйа – мин устуоруйам” пааркаҕа оҕолорго аналлаах норуоттар икки ардыларынааҕы спортивнай тэрээһин тэриллиитин уонна “Азия оҕолоро” оонньуу устуоруйатыгар Михаил Ефимович Николаев сүҥкэн оруолун туһунан кэпсиир быыстапка турар.

Санатан эттэххэ, “Азия оҕолоро” норуоттар икки ардыларынааҕы бастакы спортивнай оонньуулар 1996 сыллаахха өрөспүүбүлүкэ бастакы бэрэсидьиэнэ Михаил Николаев көҕүлээһининэн Дьокуускай куоракка ыытыллыбыттара. Бу быһаарыы эрэгийиэн устуоруйатыгар суолталаах түһүмэҕинэн буолбута.

Быыстапкаҕа кэлээччилэр Оонньууларга хайдах быһыылаахтык бэлэмнэммиттэрин, ыытыллыбытын, тэрийээччилэр туох уустуктары көрсүбүттэрин билиэхтэрэ. Ураты болҕомто маҥнайгы Оонньуу ситиһиилээхтик барарбыгар Михаил Николаев көрүүтэ, идиэйэтэ улахан сабыдыаллааҕар ууруллар.

Быыстапка үс сүрүн салааттан турар: «Михаил Ефимович Николаев – “Азия оҕолоро” спортивнай оонньуулары төрүттээччи», «Сайыҥҥы уонна кыһыҥҥы “Азия оҕолоро” оонньуулар устуоруйалара», «Култуура».

М.Е. Николаев архыып-бибилэтиэкэтэ Михаил Ефимовиһы кытта сибээстээх архыып докумуоннарын көрдөрөр: суруктар, кинигэлэр, тус маллар, Өктөмтөн аҕалыллыбыт үлэлиир остуола, көстүүмнэрэ, наҕараадалара.

Ону тэҥэ, көстүүмтэн саҕалаан аһылык толуонугар тиийэ кэпсиир ураты эксэпэнээттэр Оонньуу бу сыллар тухары хайдах сайдан кэлбитин, киэҥ таһымнаммытын көрдөрүөхтэрэ.

Экспозиция түмэл иккис мэндиэмэнигэр Өрөспүүбүлүкэ саалаҕа турар. Быыстапка алтынньы 1 күнүгэр диэри үлэлиир, киириитэ босхо.

Санатан аастахха, атырдьах ыйын 4 күнүгэр СӨ бастакы бэрэсидьиэнэ Миахил Ефимович Николаев олохтон барбыта биир сыла буолла. Михаил Ефимович өрөспүүбүлүкэни Арассыыйа бэлиитикэ уонна экэниэмикэ саамай тосту уларыйар сылларыгар салайбыта. Кини салалтатынан өрөспүүбүлүкэ сайдыы суолугар туруммутун таһынан, кылгас кэм иһигэр үлэ бары хайысхатыгар инники күөҥҥэ тахсыбыта.

Ил Дархан уонна Бырабыыталыстыба пресс-сулууспата.