Дьокуускайга муус устар 25 күнүттэн бүтүн куораттааҕы субуотунньуктар саҕаланаллар

Өрөспүүбүлүкэ күнүн иннинэ Дьокуускайга муус устар 25 күнүттэн бүтүн куораттааҕы субуотунньуктар ыытыллаллар. Ол туһунан куорат баһылыгын солбуйааччыта Владислав Слепцов сааскы санитарнай ыраастааһын ыстаабын мунньаҕар иһитиннэрдэ, диэн киин куорат дьаһалтатын пресс-сулууспата суруйар.

Бүтүн куораттааҕы субуотунньуктарга бары тэрилтэлэр кытталлар. Ыраастаныы үлэлэрэ тэрилтэлэр территорияларынан, ону таһынан уопсастыбаннай миэстэлэринэн ыытыллаллар.

«Якутдорстрой» иһитиннэриитинэн, былааннаммыт 56 939 погоннай миэтэрэ лотуоктартан 29 231 погоннай миэтэрэ итии паарынан ыраастаммыт, ити уопсай кээмэйиттэн 51%- на. Үлэ күүстээх эрэсииминэн барар. Ойуунускай, Октябрьскай, Короленко уонна Поярков аатынан уулуссаларыгар кэккэ ыарахаттар үөскээбиттэр. Онно суһал быһаарыылар ылыллыахтара. Муус устар 17 күнүнээҕи туругунан, сууккаҕа 220-тэн тахса кубометр чалбах уута оботторуллубут.

Былааннаах ууну оботторууну таһынан, тэрилтэ куорат олохтоохторуттан киирбит сайаапкаларынан үлэлиир. Дьокуускай куорат баһылыгын солбуйааччыта Владислав Слепцов олорор дьиэ пуондатын территориятыттан чалбаҕы оботторууга, хаары уонна бытовой тобохтору тиэйиигэ, ордук куһаҕан туруктаах дьиэлэр территорияларын ыраастыырга үлэни күүһүрдэргэ сорудахтаата.