Дьокуускайга «Мүөттээх Ыспааһап» бырааһынньыгар алаадьынан уонна мүөтүнэн күндүлүөхтэрэ

Дьокуускайга сарсын, атырдьах ыйын 14 күнүгэр, Мүөттээх Ыспааһап күнүн бэлиэтиэхтэрэ.

Тэрээһиҥҥэ ыалдьыттары босхо алаадьынан уонна мүөтүнэн күндүлүөхтэрэ, диэн киин куорат  дьаһалта иһитиннэрдэ.

Бырааһынньык чэппиэргэ 16:00 чаастан «Московскай» атыы-киинин таһыгар Дьокуускайдааҕы  мүөт дьаарбаҥкатыгар ыытыллыаҕа. Ону таһынан, Мүөттээх Ыспааһап күнүгэр олохтоох ыҥырыаһыттар бородууксуйаларын амсайан көрүү, мүөтү уонна ыҥырыа бородуукталарын быыстапка-атыыта, ону тэҥэ оҕолорго уонна улахан дьоҥҥо аналлаах аралдьытар бырагыраама ыытыллыахтара.

Мүөттээх Ыспааһап— бу үс Ыспааһаптан бастакыта, былыргы итэҕэлтэн силистээх-мутуктаах христианнар бырааһынньыга. Бу күн православнай таҥара дьиэтэ Пресвятой Богородицаҕа аналлаах үөрүүлээх тэрээһини ыытар. Мүөттээх Ыспааһап сыл ахсын атырдьах ыйын 14 күнүгэр бэлиэтэнэр. Бу күн сайын бүтэһик кэрчигэ ааҕыллар.