Дьокуускайга Национальнай кэнгириэс үлэтин саҕалаата

Сэтинньи 10 күнүгэр Дьокуускайга «Хотугу сиргэ экология уонна киһи доруобуйата» диэн норуоттар икки ардыларынааҕы кыттыылаах Национальнай кэнгириэс үлэтин саҕалаата.

Билим бырагыраамата килиниичэскэй диссипилиинэлэри, тэрийии тоҕоостоох боппуруостарын, ону тэҥэ Саха сирин доруобуйатын харыстабылын устуоруйатын хабар. Кэнгириэскэ Москва, Санкт-Петербург, Новосибирскай, Иркутскай, Хабаровскай уонна да атын куораттар бастыҥ мэдиссиинискэй үрдүк үөрэхтэрин кыһалара уонна билим кииннэрэ кытталлар.

«2025 сылга кэнгириэс Сахабыт сирин мэдиссиинэтэ хотугу кыраайга сайдыытын ураты бэлиэ даататыгар – 220 сылыгар ананыаҕа. Бүгүҥҥү национальнай кэнгириэс мэдиссиинэ тэрилтэлэрэ Хотугулуу-Илиҥҥи федеральнай университеты кытта бииргэ үлэлээһиннэригэр саҥа саҕахтары арыйар соруктаах. Институттар систиэмэлэрин сүрүн олоҕор практическай доруобуйа харыстабыла, ордук бастакы сүһүөҕэ турар. Тэрээһин бары кыттыылаахтарыгар, биһиги холбоһуктаах үлэбит түмүгүнэн, XXI үйэҕэ өрөспүүбүлүкэ мэдиссиинэтин сайдыытын олоҕор ууруллуохтаах этиилэр оҥоһуллалларыгар баҕарабын», – диэн СӨ  бырабыыталыстыбатын бэрэссэдээтэлин солбуйааччы Георгий Степанов бэлиэтээтэ.

Кэнгириэс бырагырааматыгар устудьуоннарга аналлаах билим-үөрэх сэминээрдэр, төгүрүк остуоллар, симпозиумнар, маастар-кылаастар, олимпиадалар, күрэхтэр уонна квизтэр киирдилэр.