Бүгүн сарсыарда, муус устар 20 күнүгэр, киин куоракка Нам улууһун күннэрин чэрчитинэн улуус салалтата уонна уопсастыбаннаһа уһулуччулаах судаарыстыбаннай уонна бэлитиичэскэй диэйэтэллэр Максим Аммосов уонна Илья Винокуров пааматынньыктарыгар тыыннаах сибэкки дьөрбөтүн уурдулар.
Тэрээһиҥҥэ Нам улууһун баһылыга Юрий Слепцов, Илья Винокуров уола, Гражданскай авиация бочуоттаах бэтэрээнэ Валерий Винокуров, улуус баһылыгын социальнай боппуруостарга солбуйааччы Петр Абрамов, култуура уонна духуобунай сайдыы управлениетын салайааччыта Семен Ядрихинскай, «Нам» түмсүү салайааччыта Гаврил Местников, улуус нэһилиэктэрин баһылыктара, М.К. Аммосов аатынан СӨ Судаарыстыбаннаһын түмэлин, Намнааҕы П.И. Сивцев аатынан история уонна этнография мусуойдарын үлэһиттэрэ, Дьокуускай куорат олохтоохторо, 17 №-дээх оскуола үөрэнээччилэрэ кыттыыны ыллылар.
Эбиэт кэнниттэн өрөспүүбүлүкэтээҕи медиа-кииҥҥэ, Нам улууһун салалтата «Быстах байыаннай дьайыы кыттыылаахтарыгар уонна кинилэр дьиэ кэргэттэригэр оҥоһуллар көмө уонна өйөбүл» диэн суруналыыстарга пресс-кэмпириэнсийэ буолла. Улуус баһылыга Юрий Слепцов, баһылык социальнай боппуруостарга солбуйааччыта Мария Игнатьева, улуус дьокутааттарын Сэбиэтин салайааччыта Алексей Винокуров, «Буойун» кэмиэрчэскэйэ суох тэрилтэ салайааччыта Павел Оконешников, бойобуой дьайыы кыттыыылааҕа Прокопий Саввинов улууска байыаннай дьайыыга сылдьар дьон дьиэ кэргэттэрин өйүүр туох үлэ ыытылларын кэпсээтилэр. «Буойун» саллааттар уонна буойуннар түмсүүлэрин салайааччыта Павел Оконешников уопсастыбаннай тэрилтэ ыытар үлэтин кэпсээтэ, былааннарын кытта үллэһиннэ.
Эмиэ бу күн М.К. Аммосов аатынан «Сэргэлээх уоттара» култуурунай киинигэр Нам улууһун талааннаах уустарын быыстапката үлэлээтэ. Ол курдук, тимири, мас оҥоһуктар, саха таҥаһын, туоһу тигии, кылтан, талахтан өрүүгэ, онтон да араас дьарыкка маастардар саталлаах илиилэринэн оҥорбут үлэлэрэ түмүллэн, дьон болҕомтотун тартылар.
М.К. Аммосов аатынан СӨ Судаарыстыбаннаһын түмэлэ М.К. Аммосов үлэтин сырдатар истиэндэлэрэ, тутта сылдьыбыт маллара киэҥ араҥа көрүүтүгэр турдулар.