Дьокуускайга наркотигы бөдөҥ кээмэйинэн атыылаабыт дьон сууттаннылар

Дьокуускай куорат суута урут сууттана сылдьыбыт, РФ гражданствота суох 55 саастаах эр киһиэхэ уонна  48 саастаах дьахтарга холбоон тэриллибит холуобунай дьыаланы көрдө.

Бииргэ олорор дьон наркотигы бөдөҥ кээмэйинэн атыылыы сатаабыттар. Дьыала матырыйаалларыттан көстөрүнэн ,бу сыл муус устар ыйга эр киһи кимэ биллибэт киһиттэн 51 гр наркотигы атыыласпыт. Ол кэннэ, дьыала иккис буруйданааччыта — дьахтар наркотигы салгыы сокуону кэһэн атыылыыр сыаллаах ккыбартыыраҕа кистээбит. Эр киһи бииргэ олорор дьахтарыгар наркотигы тарҕатарга этии киллэрбитигэр, тутанына сөбүлэспит. Буруйданааччылар наркотигы 14 өлүүгэ арааран суулаан, сокуону кэһэн кыбартыыраҕа уонна подъезд кирилиэһин анныгар кистээн сытыарбыттар. Наркотиктары быраабы араҥаччылыыр уорганнар үлэһиттэрэ булан, былдьаабыттар. Ону таһынан, эр киһи сокуону кэһэн наркотигы атыылаһа кэлбит эр киһиэхэ бөдөҥ кээмэйинэн наркотигы атыылаабыт.

Суут мунньаҕар буруйданааччылар буруйдарын сорҕотун билиммиттэр. Дьыаланы силиэстийэлиир кэмҥэ иккиэн көрдөрүүлэрин хас да төгүл уларыта сылдьыбыттар, бииргэ олорор дьахтар наркотигы атыылыы сатааһыҥҥа кыттыгаһа суоҕун мэлдьэспиттэр. Ол да буоллар, наркотигы бииргэ атыылыы сатаабыттарын мэлдьэһэллэрин үрдүнэн, суут кинилэри буруйдаахтарынан билиммит.

Суут бириигэбэринэн эр киһи РФ ХК 30-с ыст. 3 ч. — 228.1 ыст. 4 ч. «г» п., 228.1 ыст. 3 ч. «б» п. буруйдааҕынан билинилиннэ. Кини 17 сылга көҥүлэ быһылынна. Дьахтар РФ ХК 30-с ыст. 3 ч. — 228.1 ыст. 4 ч. «г» п. буруйдааҕынан билинилиннэ, 10 сылга көҥүлэ быһылынна. Бириигэбэр сокуоннай күүһүгэр киирэ илик, диэн СӨ Сууттарын холбоһуктаах пресс-сулууспата суруйар.