Дьокуускайга нэдиэлэ иһигэр 5 тыһ. тахса киһи ОРВИ-нан уонна кириибинэн ыалдьыбыт

Дьокуускайга ааспыт нэдиэлэҕэ кириибинэн уонна ОРВИ-нан ыалдьыы 5471 түбэлтэтэ бэлиэтэннэ.

Ыарыы таһыма кирбиини 28%-нан куоһарда. Маннык иһитиннэрии сэтинньи 24 күнүгэр, бэнидиэнньиккэ, ыытыллыбыт Дьокуускай куорат планеркатыгар этилиннэ. Саха сиригэр кириип уонна ОРВИ ыарыыта үрдүүрүн сэрэтэр миэрэлэри күүһүрдэр туһунан быһаарыы ылылынна. Үөрэх тэрилтэлэригэр, култуура уонна успуорт эбийиэктэригэр, эргиэн тэрилтэлэригэр уонна да атын элбэх киһи сылдьар тэрилтэлэригэр үлэһиттэр температураларын кээмэйдииллэригэр, мааска кэтэллэригэр, тириигэ аналлаах антисептиктары туһаналларыгар, салгыны ыраастыылларыгар, дезинфекциялыыр эрэсиими күүһүрдэллэригэр сүбэлэннэ.

Үөрэх тэрилтэлэригэр иитиллээччилэр, оскуола үөрэнээччилэрэ уонна устудьуоннар 20%-тан тахсалара ыарыйдаҕына, харантыын биллэриллэр. Респираторнай инфекция бастакы бэлиэлэрэ билиннэҕинэ, бэйэни эмтэммэккэ, мэдиссиинэ тэрилтэлэригэр көрдөрүнэргэ сүбэлииллэр.