Дьокуускайга нэдиэлэ иһигэр суол быһылааныгар биэс оҕо эчэйбит

Ааспыт нэдиэлэҕэ Дьокуускайга буолбут биэс суол быһылааныгар сэттэ киһи, ол иһигэр биэс оҕо эчэйбиттэр. Бу туһунан ахсынньы 8 күнүгэр киин куорат уопсай планеркатыгар иһитиннэрдилэр.

Уопсайа нэдиэлэ устата эрэгийиэн киин куоратыгар 58 суол быһылаана уонна 2318 суол быраабылатын кэһиитэ бэлиэтэннэ. 25 итирик суоппар тутуллубут, онтон үһэ – хос.

Суоппар бырааба суох 33 суоппар уонна утары суолга тахсыы 27 түбэлтэтэ быһаарыллыбыт.

Санатан эттэххэ, ахсынньы 6 күнүгэр Дьокуускайга биир күн иһигэр икки оҕону түҥнэри көппүттэрэ биллэр.