Дьокуускайга нэдиэлэ иһигэр суол саахалыгар түөрт киһи эчэйбит

Ааспыт нэдиэлэ устата Дьокуускай куорат суолларыгар 42 суол быһылаана бэлиэтэннэ, онтон иккитигэр түөрт киһи эчэйбитин туһунан сэтинньи 10 күнүгэр куорат дьаһалтатын мунньаҕар иһитиннэрдилэр.

ГАИ үлэһиттэрэ нэдиэлэ иһигэр уопсайа 1650 суол быраабылатын кэһии тахсыбытын быһаардылар. Итирик туруктаах 40 суоппар тутуллубутуттан, иккитэ иккиһин уруулга итирик олорбут. Ону таһынан, суоппар бырааба суох — 48 киһи, утары суолга тахсыы — 23 түбэлтэтэ, светофор кыһыл уотугар тохтообокко ааспыт — 42 быраабыланы кэһии уонна оҕону массыынаҕа таһыы быраабылатын кэһии — 43 түбэлтэтэ бэлиэтэннэ.