Дьокуускайга нэдиэлэ устата дьаамалары өрөмүөннүөхтэрэ

Дьокуускайга нэдиэлэ устата суолга дьаамалары өрөмүөннүөхтэрэ. Ол туһунан киин куорат баһылыга Евгений Григорьев бүгүн, ыам ыйын 2 күнүгэр иһитиннэрдэ.

Дьааманы өрөмүөннүүргэ асфальтобетону туттуохтара. Үлэни кылгас кэмҥэ бүтэрэр гына хас да биригээдэ тахсыаҕа. Онуоха ыам ыйын 6 күнүгэр асфальтобетон собуотун үлэҕэ киллэрэр былааннаахтар.

Маны таһынан Евгений Григорьев урукку сылларга «Куттала суох уонна хаачыстыбалаах айан суола» национальнай бырайыагынан тутуллубут суоллар итэҕэстэрин гарантия чэрчитинэн суох оҥорор сорудаҕы биэрдэ.