Дьокуускайга — Нерюнгри оройуонун күннэрэ

Нерюнгри оройуона тэриллибитэ 50 сылынан кулун тутар 13-15 күннэригэр Нерюнгри оройуонун күннэрэ ыытыллаллар.
Нерюнгри оройуонун күннэрэ Саха Өрөспүүбүлүкэтин Куукула тыйаатырын «Дьылҕа» («Судьба») испэктээгинэн саҕаланнылар.

Куукула-испэктээк нуучча улуу суруйааччыта Михаил Шолохов «Судьба человека» кэпсээнин матыыбынан туруоруллубут.
Сүрүн дьоруой Андрей – олох ыарахаттарын көрсүбүт боростуой суоппар уонна болуотунньук киһи. Кини чугас дьонун сүтэрэр, фашистарга билиэҥҥэ түбэһэр, хаайыы алдьархайын билэр. Ол гынан баран, хорсун быһыытынан уонна булугас өйүнэн олох туһугар охсуһар күүһү-уоҕу булар. Олоҕун саамай ыарахан кэмигэр дьылҕата киниэхэ кырачаан Ваня уолу көрүһүннэрэр. Андрей киниэхэ инникигэ эрэл илдьитинэн буолар. Испэктээк уратытынан дьоруойдар олохторун кытары оҕотун сүтэрбит ат туһунан устуоруйа бииргэ көрдөрүллэрэ буолар. Бу уус-уран уобарас көрөөччүлэри улаханнык долгутта.
Испэктээк туруорааччы-режиссера -– СӨ култууратын үтүөлээх үлэһитэ Александр Иванов, туруорааччы-худуоһунньук (куукулаларга, көстүүмнэргэ, декорацияҕа) —  Санкт Петербургтан кэлбит Светлана Струкова.

Бу үөрүүлээх күн Куукула тыйаатырын талааннаах артыыстарын култуура уонна тыйаатыр ускуустубата сайдыытыгар кылааттарын иһин наҕараадалаатылар:
-Арассыыйа Култуураҕа министиэристибэтин Махталынан – СӨ үтүөлээх артыыската Белоконь Рано Мурадовна;
-СӨ Култуураҕа уонна духуобунай сайдыыга министиэристибэтин Бочуотунай Грамотатынан куукула артыыһа Алексеев Антон Антонович;
— «Саха Өрөспүүбүлүкэтин култууратын туйгуна» бочуоттаах бэлиэнэн – куукула артыыһа Бондаренко Николай Викторович;

-Тыйаатыр диэйэтэллэрин сойууһун Бочуотунай грамоталарынан — куукула тыйаатырын уус-уран салайааччыта, СӨ ускуустубатын үтүөлээх диэйэтэлэ Петр Скрябин уонна тыйаатыр артыыһа, СӨ култууратын туйгуна Равиля Мифтахова.

Бүгүн, кулун тутар 15 күнүгэр Нерюнгри оройуонун Бочуоттаах олохтооҕо, «Окно в природу» Бүтүн Арассыыйатааҕы куонкурус кыайыылааҕа Юрий Коковин хаартысканан быыстапката Опера уонна балет тыйаатырыгар буолла.
Юрий Коковин Ураалтан, Свердловскай уобалас Золото бөһүөлэгиттэн төрүттээх. 11 сааастааҕар төрөппүттэриттэн «Заря» хаартыска аппараатын бэлэхтэтиэҕиттэн ыла аймахтарын, доҕотторун мөссүөннэрин, бөһүөлэк олоҕуттан дьикти түгэннэри,  айылҕаҕа сылдьан кыыллары, көтөрдөрү, сэдэх мастары түһэрэн саҕалаабыта.
Кини  Тимир суол техникумун бүтэрэн, аармыйаҕа сулууспалаан баран 1980 сыллар саҥаларыгар Хоту дойдуга кэлбитэ. Сибииргэ Байкал-Амур магистралын тутуу күргүөмнээх кэмнэригэр Нерюнгри таһыгар «Серебрянай бор» ыстаансыйаны тутууга кырааны көтөҕөөччүнэн үлэлээбитэ, Нерюнгритааҕы ГЭС-кэ тепловоз бастакы машинистарыттан биирдэстэринэн буолбута. Олоххо араас буолар: доруобуйатыгар эчэйиини ылан, үлэтиттэн барарга күһэллибитэ. Салгыы оройуоннааҕы хаһыакка хаартыска түһэрээччинэн үлэлии барбыта. Онтон ыла кини хаартыскалара өрөспүүбүлүкэ, Арассыыйа араас таһаарыыларын, хаһыаттарын киэргэтэллэр. Юрий Коковин араас куонкурустарга уонна бэстибээллэргэ кыттан, лауреат, кыайыылаах үрдүк ааттарын ылар. Нерюнгрига «Индустрия Севера» хаһыакка үйэ чиэппэрэ үлэлээбит хаартыска түһэрээччини, суруналыыһы Нерюнгрига билбэт киһи суоҕун кэриэтэ.

Нерюнгри оройуонунун күннэрэ  бүгүн 18.00 чаастан «Пульс Южной Якутии» гала-кэнсиэрдинэн түмүктэниэхтэрэ.