Дьокуускайга оҕолор уһуйаантан куоппуттар

Бэҕэһээ, от ыйын 28 күнүгэр, Дьокуускайга түөрт оҕо уһуйаантан куотан, икки чаас куорат устун күүлэйдээбиттэр. 

Дьокуускай полициятын дьуһуурунай чааһыгар Бүлүүлүүр суолга баар оптуобус тохтобулун аттыгар улахан дьоно суох хас даҕаны оҕо ис таҥастаах эрэ сылдьалларын туһунан эр киһи иһитиннэрбит. Бу туһунан СӨ ИДьМ суруйар.

Суһал бэрэбиэркэ быһаарбытынан, бу 4-7 саастаах түөрт оҕо чааһынай уһуйаантан куоппуттар. Иитээччилэр оҕолор сүппүттэрин 20 мүнүүтэ буолан баран биирдэ билбиттэр, бэйэлэрэ көрдүү сатаабыттар.

Оҕолор уулуссаҕа икки чаас курдук сылдьыбыттар. Кинилэри олохтоох киһи бэлиэтии көрөн, тута полицияҕа тыллаабыт.

Быһылаанынан бэрэбиэркэ ыытыллар.