Дьокуускайга Оһуокай искибиэрэ өрөмүөннэннэ

Оһуокай өрөспүүбүлүкэтээҕи уопсастыбатын (салайааччы А.Д.Данилов-Дьулуур Хаан) салалтатынан Дьокуускай куоракка Култуура уонна сынньалаҥ пааркатыгар Оһуокай искибиэрэ аһыллыбыта. Онно үс төбөлөөх Өксөкү дьаралыктаах сэргэ туруоруллубута.

Оһуокайы салайбыт бэрэссэдээтэллэр, үтүөлээх Дархан уонна Аар Дархан этээччилэр хаартыскалаах истиэндэ оҥоһуллубута. Сайыҥҥы, сааскы, күһүҥҥү кэмҥэ оһуокайдыырга үчүгэй буоллун диэн төгүрүччү бетон тэлгэммитэ.

Быйыл Александр Джурович солбуйааччыта Александр Тарскай быһаччы салалтатынан оһуокайдыыр искибиэрбит өрөмүөннэннэ. Сэргэбит, хаартыскалаах истиэндэлэр саҥардыллан кырааскаланнылар уонна ааспыт Туймаада ыһыаҕын кыайыылаахтара, Дархан аатын ылбыт этээччилэр мэтириэттэрэ эбилиннэ.

Оһуокай искибиэрин аллеятыгар хаһыллан хаалбыт аһаҕас сирдэр бетоннаммыттара. Бу ытык миэстэ куорат биир саамай кэрэ искибиэринэн буолар. Онон быйылгы кыстыгы Оһуокай уопсастыбата тэрээһиннээхтик көрсөр.

Марта Николаева.