Дьокуускайга оперативниктар маҕаһыынтан портативнай колонкалары уорууну арыйдылар

ИДьМ 2 №-дээх полициятын отделыгар цифровой уонна бытовой тиэхиньикэни уорбуттарын туһунан иһитиннэрии киирбит. Хоромньу суумата 13 тыһыынча солк. буолбут. Бу туһунан СӨ ИДьМ пресс-сулууспата суруйар.

Суһал-көрдүүр дьаһалларынан холуобунай ирдэбил үлэһиттэрэ урут сууттана сылдьыбыт 25 саастаах уорбаланааччыны туттулар.

Эр киһи атыы-эргиэн маҕаһыыныгар киирэн портативнай колонканы сонугар уктан тахсан, уорбута биллибит. Биир нэдиэлэнэн иккиһин тиийэн атын колонканы уорбут. Уорбут тиэхиньикэни 8,5 тыһ. солк. ааһан иһэр дьоҥҥо атыылаабыт уонна харчыны тус наадатыгар туһаммыт. РФ Холуобунай Кодексатын 1 ч. 158 ыст.  холуобунай дьыала тэрилиннэ.