Дьокуускайга оптуобус 56 саастаах эр киһини түҥнэри көппүт

Куорат таһынааҕы рейсовай оптуобус Покровскай тракт 10-с км учаастагар эр киһини түҥнэри көппүт. Бу туһунан киин Госавтоинспекцияҕа иһитиннэрдилэр.

Суол быһылаана муус устар 24 күнүгэр «Три лимона» атыы-эргиэн дьиэтин таһыгар тахсыбыт. Оптуобус Хатас сэлиэнньэтин диэки айаннаан испит. Тырааныспар тохтобултан суолга тахсарыгар 56 саастаах эр киһини түҥнэри көппүт. Суһал мэдиссиинэ көмөтүн биригээдэтэ эмсэҕэлээбит киһини балыыһаҕа илдьибит. Эр киһи элбэх уҥуох тостуулааҕа диагностаммыт.

Муус устар 24 күнүгэр киин куорат территориятыгар барыта 8 суол саахала тахсыбыта регистрацияламмыт. Госавтоинспекция чахчыларынан, сыл саҕаланыытыттан Дьокуускайга араас саахалларга 36 киһи эмсэҕэлээбит.