Мария Васильева хаартыската, ЯСИА.
Дьокуускайга уопсастыбаннай тырааныспарка хонтуруоллааччылар баар буолуохтара. Кинилэр билиэтэ суох айаннааччылары тутуохтара уонна ыстарааптыахтара. Ыстараап суумата 4000 солкуобай буолуоҕа дииллэр. Ол туһунан СИА-ҕа куорат суолга-тырааныспарка сулууспатын салайааччыта Эдуард Садовников кэпсээбит.
“Хонтуруоллааччылар (контролердар) билиэтэ суох айаннаан иһээччилэргэ административнай кэһиигэ боротокуол толоруохтара. Маннык үлэһиттэр атын эрэгийиэннэргэ үгүстэригэр бааллар.
Сокуоҥҥа бырайыас төлөммөтөҕүн иһин ыстараап туһаныллыаҕа. Аан бастаан кэстэххэ – 2000 солкуобай, хаттаан түбэстэххинэ – 4000 солкуобай, — диэтэ Эдуард Садовников.
Кини кэпсииринэн, былырыыҥҥыттан социальнай каартанан – социальнай, оҕо, оскуола уо.д.а. айаннааччы элбээбит. Ол эрээри маннык каарталарынан үксүгэр атын дьон туһанар буолбут. Холобура, улахан дьон оскуола оҕотун каартатынан айанныыра баар суол. Маныаха тиэйээччигэ 45 солкуобай (уу харчынан аахсыыга) оннугар 23 солкуобай субсидия көрүллэр. Онон мантан сылтаан айдаан тахсар”, — диэн бэлиэтээтэ Садовников.
Кини этэринэн, саҥа сокуон пассажирдары дьиссипилиинэлээх оҥоруоҕа.
“Бу кыһын сибээс үлэлээбэтэҕэр пассажирдар 80 бырыһыаннара төлүүртэн акаастаммыта. Кырдьык, маныаха айанньыттар буруйдара суох, суоппардар эмиэ. Дьиҥэ, өҥө оҥоһуллубута эрээри, төлөбүр киирбэтэҕэ. Онон тиэйээччилэр хоромньуну көрсүбүттэрэ”, — диир кини.
Дьокуускай олохтоохторо оптуобустан тахсан иһэн төлүүр идэлээхтэр. Онон аан таһыгар валидатордар туруохтаахтар.
“Бу саҥаны киллэрии пассажирдары кэтээн көрөөрү, бүддьүөтү ыстараабынан улаатыннараары буолбакка, уопсастыбаннай тырааныспарка мөккүөр тахсарын аччатыыга ананар”, — диэн быһаарда Эдуард Садовников.
Хонтуруоллааччылар оптуобуска хаһан баҕарар киирэн кэлиэхтэрин сөп. Федеральнай сокуоҥҥа олоҕуран быраабыланы кэһээччилэри булан, кэһии туһунан боротокуол толорор кыахтаахтар. Ыстараабы уу харчынан эбэтэр онлайн төлүөххэ сөп. Хонтуруолу Дьокуускай административнай хамыыһыйата олохтуоҕа.
Хаартыска: М.Васильева, СИА.
Саха сирин Үлэҕэ уонна социальнай сайдыыга министиэристибэтин чэрчитинэн, 2025 сылга байыаннай дьайыы кыттыылаахтарын 889 төрөппүтэ…
Ис дьыала министиэристибэтин 4 №-дээх управлениетын полицияҕа отделын дьуһуурунай чааһыгар өттүгэр быһах баастаах киһи киирбитин…
Олунньу 12 - 14 күннэригэр СӨ бырабыыталыстыбатын бэрэссэдээтэлин солбуйааччы Анатолий Семенов салайааччылаах министиэристибэлэр, биэдэмистибэлэр бэрэстэбиитэллэрэ…
Судаарыстыбаннай демографическай уонна дьиэ кэргэн бэлиитикэтин олоххо киллэрэр Сэбиэт мунньаҕын түмүгүнэн, Владимир Путин муус устар…
Бу күннэргэ Саха сирин киин куоратыгар Дьокуускайга аан бастаан художественнай гимнастикаҕа Уһук Илиҥҥи федеральнай уокурукка…
Москва уобалаһын Красногорской балыыһатыгар 46 саастаах дьахтар хабаҕыттан косметикаҕа туттуллар харандааһы хостообуттарын туһунан Москва уобалаһын…