Дьокуускайга Орджоникидзе болуоссакка фонтан хапытаалынай өрөмүөнэ түмүктэннэ

Бүгүн, атырдьах ыйын 31 күнүгэр, Орджоникидзе болуоссакка фонтан хапытаалынай өрөмүөнүн кэнниттэн үлэтэ түмүктэннэ. Бэдэрээтчит фонтаны тургутан көрөн холбоото. Бу туһунан киин куорат мэриятын пресс-сулууспата иһитиннэрэр.

Үлэни туттан баран, фонтаны кэлэр сайыҥҥа диэри консервациялыахтара уонна «Кытыйа»  конструкциятын туруоруутугар киириэхтэрэ. «Орджоникидзе болуоссатыгар баар куорат киин фонтана 20-тэн тахса сыл үлэлээбитин тухары биирдэ да хапытаалынайдык өрөмүөннэммэтэҕэ. Быйыл сайын фонтаны өрөмүөннээтилэр – турбаларын, уотун-күөһүн, насостуур тэрилин бүтүннүү уларыттылар, бу барыта саҥардыллыыга наадыйара. Үлэ от ыйын 15 күнүттэн саҕалаан, 1,5 ый устата иһигэр ыытылынна. Үлэни тутуох иннинэ фонтаны муҥутуур улахан уонна саамай кыра кыаҕынан тургутан холбоон көрбүппүт», – диэн Дьокуускай куорат уокуругун дьаһалтатын ОДьКХ уонна энергетика департаменын начаалынньыга Иван Негнюров иһитиннэрдэ.