Дьокуускайга оскуола остолобуойдарын аныгылыы кафеларга саҥардан оҥоруохтара

Дьокуускай түөрт оскуолатыгар саҥа үөрэх дьылыгар буфеттары аныгылыы кафеларга кубулутуохтара.

«Саҥа көрүҥнээх оскуола буфета» бырайыагы «ЦРО» МАУ бэйэтин үбүнэн-харчытынан олоххо киллэрэр. Балаҕан ыйын 1 күнүгэр Дьокуускай куорат лиссиэйигэр, Н.А. Алексеева аатынан Тэхиниичэскэй лиссиэйгэ, Оҕо айымньытын дыбарыаһыгар уонна Саха-корейскай оскуолаҕа аныгылыы истиллээх уонна ураты эйгэлээх кафелар арыллыахтара.

«Буфеттар хас биирдии оскуолаҕа тус-туһунан оҥоһуллубут аныгылыы дизайннаах, истиллээх көстүүлэниэхтэрэ. Үөрэнээччилэр муодунай кафеҕа кэрэ көстүүллээх эйгэҕэ эбиэттиир уонна уруоктан сынньанар саҥа миэстэлэниэхтэрэ. Саҥа миэбэл уонна тэрил атыылаһылынна. Үрдүк олоппостордоох кырачаан баарнай стойкалар кытта баар буолуохтара. Ону таһынан, оскуола кафелара, холобур, биһиги пуобардарбыт ыытар кулинарнай маастар-кылаастарын курдук, араас тэрээһиннэри ыытар былаһаакканан буолуохтара.

Өрөмүөн үлэтэ номнуо түмүктэнэн эрэр. Билигин талааннаах худуоһунньуктар остуолобуой эркинин ойуулаан симииллэр», — диэн «ЦРО» МАУ дириэктэрэ Варвара Кычкина кэпсээтэ. Итини таһынан, оператор саҥа үөрэх дьылыгар оскуола менютун саҥардар былааннаах. Сүрүн болҕомто олохтоох оҥорон таһаарыы аһыгар-үөлүгэр ууруллуоҕа.