Дьокуускайга оскуола үөрэнээччилэригэр Норуот сомоҕолоһуутун күнүгэр пааспардарын туттардылар

Дьокуускайга Норуот сомоҕолоһуутун күнүгэр аналлаах тэрээһиҥҥэ Саха сирин Бырабыыталыстыбатын бэрэссэдээтэлэ Кирилл Бычков алта оскуола үөрэнээччитигэр бастакы пааспардарын туттарда.

«Пааспары ылар олус долгутуулаах түгэн этэ. Мин бу бэлиэ күҥҥэ пааспарбын ылбыппыттан олус үөрдүм. Үөрэҕим таһынан монтааһынан дьарыктанабын уонна оскуола медиа-киинигэр үлэлиибин. Уруһуйдуурбун сөбүлүүбүн. Бу үөрэх сылыгар художественнай култуураҕа Бүтүн Арассыыйатааҕы оскуола олимпиадатын кыайыылааҕа уонна физика, нуучча тылыгар призер буолбутум. Ону тэҥэ математика уонна химия түмүктэрин күүтэбит. Инникитин олохпун инженерияны кытта сибээстиэхпин баҕарабын. Биһиги дойдубутугар бу идэ олус ирдэнэр. Мин эмиэ бу эйгэни интэриэһиргиибин», — диэн Дьокуускай куорат лиссиэйин үөрэнээччитэ Дмитрий Нечаев үллэһиннэ.