Дьокуускай пааркатыгар кыыска эр киһи саба түспүтүн туһунан сымыйа сурах тарҕаммыт

Балаҕан ыйын 2 күнүгэр куйаар ситимин кэтээн көрүү түмүгэр, киэһэ 18.45 чааска Дьокуускай пааркатыгар биллибэт киһи 10 саастаах кыыска саба түспүтүн туһунан сонун тарҕаммыта биллибитэ. Бу туһунан Саха сирин ИДьМ пресс-сулууспата иһитиннэрэр.

ИДьМ управлениетын холуобунай салаатын үлэһиттэрэ эр киһи сылдьыбыт сирин чинчийбиттэр, видеону үөрэппиттэр, видеону устубут киһини булан ыйыталаспыттар. Сонуну бигэргэтэр чахчылар булуллубатылар. Дьыаланы чинчийээччилэр быһаарбыттарынан, ол киэһэтин 54 саастаах олохтоох киһи уолун успуорт уораҕайыгар эрчиллиигэ аҕалбыта биллибит. Кэлин дьиэтигэр төннөн, видео тарҕаммытын көрбүт. Быһаарсыы кэнниттэн, видеону устааччылар  алҕаһы таһаарбыттарын өйдөөбүттэр.

Полиция өссө төгүл санатар, атын киһи аатын-суолун, чиэһин түһэрэр сымыйа сонуну тарҕатыыга  холуобунай эппиэтинэс сүктэриллэр.