Дьокуускайга “Патриот” өй-байыаннай күрэхтэһиини үөрүүлээх быһыыга-майгыга арыйдылар

Дьокуускайга Саха сирин идэҕэ бэлэмниир үөрэҕин тэрилтэлэрин устудьуоннарын икки ардыларыгар ыытыллар “Патриот” интеллектуальнай-военизированнай күрэхтэһии түмүктүүр түһүмэҕэ саҕаланна. Күрэхтэһии номнуо үһүс сылын субуруччу ыытыллар уонна ыччаты патриотизмҥа иитэргэ, гражданскай көхтөөх көрүүгэ, Аҕа дойду интэриэһин көмүскүүргэ бэлэм буоларга туһаайыллар.

Быйыл күрэхтэһии Н.Г. Чернышевскай аатынан Бүлүүтээҕи педагогическай кэллиэһи бүтэрбиттэр, хотугу многоборьеҕа успуорт маастардара, “Эр санааланыы уордьан” кавалердара, “Хорсуннарын иһин” мэтээллэрдээх, анал байыаннай эпэрээссийэҕэ байыаннай ытык иэстэрин толоро сылдьан суох буолбут Степан Руфов уонна Владислав Тарабукин  сырдык кэриэстэригэр ыытыллар.

Тэрээһин үөрүүлээх аһыллыытыгар үөрэх уонна билим миниистирин бастакы солбуйааччы Михаил Присяжнай, өрөспүүбүлүкэ идэҕэ үөрэтэр тэрилтэлэрин сайыннарар институт дириэктэрин солбуйааччы Александр Сатыров, Н.Г.Чернышевскай аатынан Бүлүүтээҕи профессиональнай-педагогическай кэллиэс дириэктэрэ Иван Алексеев, байыаннай дьайыы бэтэрээнэ, “Хорсунун иһин уордьан” кавалера, Саха сирин үөрэҕин систиэмэтин туйгуна, Владислав Тарабукин биир пуолкаҕа сулууспалаабыт киһитэ Николай Семенов, анал байыаннай эпэрээссийэ кытыылаахтарын дьиэ кэргэттэрин бэрэссэдээтэлэ Жанна Грекова кытыннылар. Ону тэҥэ, байыастар чугас дьоно, биир дойдулаахтара уонна биир пуолкаҕа сулууспалаабыттара тэрээһин ыалдьытынан буоллулар.

“Бэтэрээннэр уонна уопсастыбаннай тэрилтэлэр, үлэ кэлэптииптэрэ, ону тэҥэ, үөрэнээччилэр бэйэлэрэ күрэхтэһиини өйүүллэрэ үөрдэр. Бу курдук оонньуулар баар буолан устудьуоннар байыаннай-спортивнай успуорт көрүҥнэригэр, атыттары кытта холоһон көрөр кыахтаналлар. Манна успуорт эрэ буолбакка, устуоруйа, судаарыстыба, байыаннай күүстэр туһунан билиилэрин бэрэбиэркэлииллэр” – диэн үөрэх уонна билим миниистирин бастакы солбуйааччы Михаил Присяжнай бэлиэтиир.

Сүүмэрдиир түһүмэххэ идэҕэ үөрэтэр тэрилтэлэр 27 байыаннай-патриотическай кулууптарыттан 270 устудьуон кытынна, итинтэн Арассыыйа устуоруйатыгар олимпиада уонна ырыаны, хаамыыны көрүү түмүгэр финалга 11 хамаанда киирдэ.

Бастакы блокка маастарыстыбаларын, хамаанданан санааларын,  кыахтарын уонна строевой бэлэмнэниигэ, буулдьанан ытыыга кыайыыга дьулуурдарын, уопсай армейскай бэлэмнэниигэ уонна РФ корабельнай воинскай солоҕо билиилэрин көрдөрүөхтэрэ.  Иккис блок саамай уустук уонна саамай көстүүлээх түһүмэх – военизированнай эстафета. Тэрээһин Ю.А. Готовцев аатынан Дьокуускайдааҕы сервис технологическай тиэхиньикумун баазатыгар буолар.

Ил Дархан уонна Бырабыыталыстыба пресс-сулууспата.