Дьокуускайга «Патриот» Ыччат киинэ аһылынна

Бүгүн, ахсынньы 15 күнүгэр, Дьокуускай куорат 202 микрооройуонугар «Патриот» ыччат киинэ аһылынна.

Үөрүүлээх бэлиэ түгэҥҥэ Ил Дархан Айсен Николаев кытынна.  Ыччат Ил Дархан саалаҕа киирэрин уруйдаан-айхаллаан көрүстэ, ол кэнниттэн аныгы үҥкүүнэн эҕэрдэлээтэ.

«Ыччат патриотическай киинэ аһыллыбытынан итии-истиҥ эҕэрдэ буоллун! Бүгүн таһырдьа -50-ча кыраадыс тымныы эрээри, биһиги бүгүн ураты тутуулаах «Патриот» киини аһан эрэрбитинэн сылаас салгын илгийэр. Бу киини тэрийэрбитигэр элбэх санаа баара, ол кэнниттэн толкуйдаан баран, манна “Бригантина” киинигэр аһарга быһаарбыппыт. Бу бырайыагы олоххо киллэрэргэ үлэлэспит Арассыыйа ыччатын министиэристибэтигэр, СӨ ыччатын министиэрситибэтигэр уонна “Саха сирин тимир суоллара” тэрилтэҕэ махталбын тиэрдэбин. Манна ыччат бары өттүнэн сайдарыгар, айарыгар-тутарыгар, кэпсэтэригэр бары усулуобуйа оҥоһулунна. Саамай сүрүнэ – ыччат мустан санаа атастаһыан, айан тутуон баҕарабын», — диэтэ Айсен Николаев.

СӨ ыччат дьыалатыгар уонна социальнай алтыһыыларга миниистир Петр Шамаев өрөспүүбүлүкэ баһылыгар уонна бырабыыталыстыбатыгар ыччат саҥа киинэ аһыллыбытынан махтанна.

«Бастатан туран, Ил Дархаҥҥа Айсен Сергеевичка ыччакка уурар болҕомтотун, өйөбүлүн иһин махтанабын. Бу киин аһыллыыта, арааһа, саамай кэтэһилээх буолуо. Маннык ыччат киирэн сынньанар, санаа атастаһар, дьарыктанар киинэ аһыллыбыта үөрүүлээх. Мин эрэнэбин, бу кииҥҥэ ыччат сөбүлээн сылдьыа, дьарыктаныа. Онуоха биһиги, “Патриот”  ыччат киинэ уонна министиэристибэ туох баар кыахпытын ууран үлэлиэхпит. Бу ыччат бэйэтин бырайыактарын олоххо киллэрэр, түмсэр сирэ буолуо», — диэн Петр  Шамаев эттэ.

“Патриот”  ыччат киинин салайааччыта Сулустан Заболоцкай саҥа киин аһыллыбытынан эҕэрдэлээтэ уонна ыччат дьоҥҥо аан аһаҕаһын, хаһан баҕарар кэлэн бэйэлэрин сайыннаралларыгар кыах баарын эттэ, ыҥырда.

«Өрөспүүбүлүкэ салалтатыгар ыччакка ураты болҕомтону ууран, дьаныһан туран маннык үчүгэй дьиэни тэрийбиттэригэр махталбын тиэрдэбин. Бу дьиэни өрөмүөннүүргэ кыттыбыт бары дьоҥҥо, волонтердарга, устудьуоннарга, тутааччыларга барҕа махталбын этэбин. Дойду кэскилэ – ыччакка!», — диэтэ Сулустан Заболоцкай.

Бэлиэ тэрээһиҥҥэ бу киини тутуспут, өрөмүөннээбит, сыраларын ууран үлэлэспит дьоҥҥо махтал тыллара, наҕараадалар туттарылыннылар. Тэрээһин ыччат кэнсиэринэн түмүктэннэ.

Киин туһунан кылгастык аҕыннахха, Арассыыйа Бэрэсидьиэнэ Владимир Владимирович Путин национальнай сыал биир көрүҥүнэн патриотическай үлэни сайыннарыыга усулуобуйаны тэрийии диэн биллэрбитэ. Патриотическай иитии бары көрүҥнэрин координациялыыр сыалтан СӨ Ил Дархана А.С. Николаев сорудаҕынан Саха Өрөспүүбүлүкэтин «Патриот» ыччат киинэ» судаарыстыбаннай бүддьүөт тэрилтэтэ тэриллибитэ.

«Патриот» ыччат киинин иэнэ 3209,1 кв.м.  Манна уопсайа 120000 ыччат хабыллара былааннанар. 2-с этээскэ «Бастакылар хамсааһыннара», Быһаарыыны ылынар пространство, кэмпириэнсийэ саалата, быыстапка зоната, аминистрация хоһо, Роллердром, Оҕо сынньанар сирэ, Ийэ уонна оҕо хоһо бааллар. 3-с этээскэ: көрсүһэр сир, Санаа устуудьуйата, резиденнэр хосторо, Сайдыы пространствота, коворкинг-киин, дискуссиялыыр сир, хамсааһыннар пространстволара, быыстапка зоната, мастырыскыай (1,2) бааллар.

Ыччат киинэ маннык сүрүн хайысхаларынан үлэлиир: патриотическай иитии; кэскиллээх үлэни сайыннарыы уонна ыччат уопсастыбаннай түмсүүлэрин кытта үлэ; ыччат бэлиитикэтин уонна патриотическай иитиини информационнай өттүнэн хааччыйыыны сайыннарыы; ыччат айар уонна култуурунай сынньалаҥын көҕүлээһин; экэнэмиичэскэй дьарыктаах буолууну өйөөһүн, ыччат урбаанын уонна дьыалабыай актыыбынаһын сайыннарыы; ыччаты кытта үлэлиир координационнай систиэмэни сайыннарыы.

«Патриот» киин — патриотическай иитии эйгэтигэр ыччаты кытта үлэлиир саҥа көрүҥү тутуһар.