Дьокуускайга полицейскайдар сылаас тохтобулу алдьаппыт оскуола оҕолорун кимнээхтэрин быһаардылар

Дьокуускайга полицейскайдар «Автодорожнай факультет» сылаас оптуобус тохтобулун павильонугар аймалҕаны тарпыт оҕолор кимнээхтэрин быһаардылар.

Кинилэр үс 11 саастаах оскуола үөрэнээччилэрэ буолаллара билиннэн, олортон биирдэстэрэ урут сокуону кэспит оҕолор дьыалаларыгар профилактическай учуокка турбут эбит, диэн СӨ ИДьМ-ын пресс-сулууспата иһитиннэрэр.

«Бэрэбиэркэ кэмигэр оҕолортон биирдэстэрэ сокуону кэспит оҕолор дьыалаларыгар инспекцияҕа (ПДН) урут профилактическай учуокка турара быһаарылынна. Атын икки оҕо эмиэ бэрэбиэркэ түмүгүнэн профилактическай учуокка туруорулуннулар. Төрөппүттэргэ сокуону кэспит оҕолору иитиигэ уонна көрүүгэ-харайыыга эбээһинэстэрин толорботохторун иһин административнай матырыйааллар оҥоһулуннулар», — диэн Саха сиринээҕи ИДьМ пресс-сулууспата быһаарда.

Бу чахчынан бэрэбиэркэ бара турар, ону түмүктээн процессуальнай быһаарыы ылыллыаҕа. Дьокуускай куорат Суол-иис инфраструктуратын уонна куорат тырааныспарын департаменын иһитиннэриитинэн, кэнники кэмҥэ сылаас тохтобулларга маннык вандализм түбэлтэтэ үксээтэ. Сүнньүнэн ити дьайыыга оскуола үөрэнээччилэрэ сыһыаннаахтар.