Дьокуускайга полицейскайдар улахан суумалаах харчыны уорбуттарын арыйдылар

Дьокуускай полициятын 4 №-дээх отделыгар куорат олохтооҕо 155 тыһ. солк. харчыбын уордулар диэн сайабылыанньа киллэрбит.

Холуобунай ирдэбил  үлэһиттэрэ суһал-силиэстийэлиир үлэни ыытан, уорбаланар киһини быһаардылар. Ол курдук харчытын уордарбыт киһи 37 саастаах билсэр дьахтара буолан тахсыбыт.

Дьахтар эр киһиэхэ ыалдьыттыы кэлбит. Кыбартыыра хаһаайына маҕаһыыҥҥа тахсарын кэтэһэн олорон, ыскааптан 155 тыһ. солк. харчытын сойботон ылбыт, ол кэннэ туох да буолбатаҕын курдук салгыы ыалдьыттыы олорбут. Харчыта сүппүтүн эр киһи сарсыныгар биирдэ билбит. Уорбаланааччы уорбут харчытын иэһин төлүүргэ бараабыт.

РФ ХК “Уоруу” 158 ыст. 2 ч. холуобунай дьыала тэрилиннэ, бу ыстатыйанан 5 сылга диэри көҥүлүҥ быстыан сөп, диэн иһитиннэрэр ИДьМ Саха сиринээҕи пресс-сулууспата.