Дьокуускайга полиция электроинструменнары уорууга уорбаланааччыны тутта

Дьокуускайга полиция 1 №-дээх салаатын дьуһуурунай чааһыгар тэрилтэттэн электроинструменнары уорбуттарын туһунан сайабылыанньа киирбит. Уопсай хоромньу суумата 104 тыһ. солк. буолбут.

Суһал-силиэстийэлиир үлэ кэмигэр холуобунай ирдэбил үлэһиттэрэ эрдэ сууттана сылдьыбыт  Дьааҥы улууһуттан төрүттээх 40 саастаах киһи уорууга кыттыгастааҕын быһаардылар.

Түүнүн уорбаланааччы дьиэ аанын тимиринэн алдьатан, үлэлиир дьиэлэригэр киирбитэ быһаарылынна. Онно киирэн икки болгарканы, сылытар пушканы, икки шуруповерты уонна да атын инструменнарын уорбут. Буруйдаах киһи уорбут малларын ломбарка туттарбыт, онтон ылбыт харчытын бэйэтин баҕатынан туттубут.

РФ Холуобунай кодексатын «Уоруу» 158 ыстатыйатын 2-с чааһынан холуобунай дьыала тэрилиннэ, манан 5 сылга диэри болдьохтоон көҥүлэ быһыллар накаастабыл көрүллэр, диэн  Арассыыйа МУ ИДьМ “Дьокуускайдааҕы” пресс-сулууспата иһитиннэрэр.