Дьокуускайга полиция үлэһиттэрэ дьахтар ырбаахытын кэппит эр киһини туттулар

ИДьМ 2-с нүөмэрдээх полиция салаатын дьуһуурунай чааһыгар Орджоникидзе аатынан уулуссаҕа турар атыы-эргиэн киинин аттыгар дьахтар таҥаһын кэппит эр киһи соччото суохтук быһыыланарын, ааһан иһэр дьону куттуурун туһунан иһитиннэрии киирбит.

Полиция боломуочуйалаах учаскуобайа Горнайтан төрүттээх 47 саастаах киһи буоларын быһаарбыт.

Бэҕэһээ, бэс ыйын 9 күнүгэр, быраабы кэһээччи арыгы иһэн баран дьоҥҥо көрдөрөн туран сирэйин кырааскаламмыт, быдьар тылынан саҥарбыт, ааһан иһэр дьону буулаабыт, куорат уопсастыбаннай миэстэтигэр сиэри таһынан быһыыламмыта  быһаарыллыбыт.

Ол түмүгэр РФ Административнай быраабы кэһии кодексын 20.1 ыст. 1 ч. (“Кыра күлүгээннэһин”), 20.21 ыст. (“Арыгы иһэн баран уопсастыбаннай миэстэҕэ тахсыы”)  административнай матырыйаал толоруллубут.

Ону таһынан, тустаах киһи мировой суут уурааҕынан РФ Административнай быраабы кэһиигэ кодексын 6.21 ыст. 1 ч. (“Пропаганда нетрадиционных сексуальных отношений и (или) предпочтений, смены пола, отказа от деторождения”) 50000 солк. суумалаах ыстараап накаастабыллаах административнай эппиэтинэскэ тардыллыбыт.

Ити туһунан ИДьМ Дьокуускайдааҕы пресс-сулууспата иһитиннэрэр.