Доҕоругар бэлэхтээри маҕаһыынтан табаары уорбут…

ИДьМ сулууспатын«Дьокуускайдааҕы» 2-с №-дээх полиция отделын дьуһуурунай чааһыгар маҕаһыынтан табаар уоруллубутун туһунан сайабылыанньа киирбит.

Уопсайа 32 тыһыынча солкуобай суумалаах хоромньу тахсыбыт.

Суһал ирдиир үлэлэр түмүктэригэр, холуобунай ирдэбил уонна «Дьокуускайдааҕы» 2-с №-дээх полиция отдел үлэһиттэрэ уорбаланааччы кимин быһаарбыттар. Кини 30 саастаах Дьокуускай куорат олохтооҕо эбит.

Полиция үлэһиттэрэ быһаарбыттарынан, эр киһи маҕаһыыҥҥа атыылаһааччы курдук киирбит уонна өттүккэ баанар суумканы кытары эр киһи харыга кэтэр чааһытын ылбыт. Эр киһи табаары ылан баран, төлөөбөккө, каасса аттынан холкутук хааман тахсан барбыт. Түөкүн билиммитинэн, уоруллубут чаһы уонна суумка кини доҕоругар бэлэх буолуохтаах эбит.

Уоруллубут табаар былдьанна диэн Арассыыйа ИДьМ-н «Дьокуускайдааҕы» салалтатын пресс-сулууспата иһитиннэрэр.

Малы-салы уорбут киһиэхэ РФ Холуобунай кодексын 158 ыстатыйатын 1 чааһынан («Уоруу») холуобунай дьыала көбүтүллүбүт, онно 2 сылга диэри көҥүлэ быһыллыан сөп.