Дьокуускайга профлиистэри уорууга уорбаланааччыны туттулар

ИДьМ 3 №-дээх полициятын дьуһуурунай чааһыгар биллибэт киһи учаастактан тимир профлиистэри уорбутун туһунан тыллаабыттар. Хоромньу 40 тыһыынча солкуобайга тэҥнэспит.

Холуобунай ирдэбил үлэһиттэрэ суһал-көрдүүр дьаһалларынан 57 саастаах олохтоох эр киһини туппуттар. Силиэстийэ быһаарыытынан, уорбаланааччы Маҕанныыр трасса учаастагын аттынан ааһан иһэн  профлиистэри бэлиэтии көрбүт. Кини этэринэн, быраҕыллыбыт, ким да наадыйбат дии санаабыт уонна бэйэтигэр ыларга быһаарыммыт.

Сотору кэминэн бэйэтин массыынатынан төннүбүт уонна 20 тимир профлииһи  учаастактан тиэйэн илдьэ барбыт. Холуобунай дьыала тэрилиннэ. Уорбаланааччы 5 сылга диэри болдьоххо көҥүлэ быһыллыан сөп. Бу туһунан ИДьМ пресс-сулууспата иһитиннэрэр.