Дьокуускайга «Путь ВОИНа» турнир финалын ыытар миэстэтэ быһаарылынна

Ил Дархан Айсен Николаев быйыл балаҕан ыйын 15-21 күннэригэр Саха сиригэр ыытыллыахтаах «Путь ВОИНа» Бүтүн Арассыыйатааҕы байыаннай-тактическай күрэҕин тэрийии боппуруостарыгар оробуочай мунньаҕы ыытта.

«ВОИН» ыччаты байыаннай-спортивнай бэлэмнээһин уонна патриотическайдык иитии Киинин саамай бөдөҥ турнира Арассыыйа Федерациятын Бырабыыталыстыбатын бэрэссэдээтэлин солбуйааччыта — РФ Бэрэсидьиэнин Уһук Илин федеральнай уокуруктааҕы боломуочуйалаах бэрэстэбиитэлин Юрий Трутнев көҕүлээһининэн ыытыллыаҕа.

Мунньах кэмигэр логистика, кыттааччылары түһэрии, инфраструктураны тэрийии уонна куттал суох буолуутун боппуруостара ырытылыннылар.

Финальнай тургутуулары ыытар миэстэтинэн «Энергетик» оҕо сынньалаҥ лааҕырын таһынааҕы сирэ быһаарылынна. Бу былаһаакка «ВОИН» киин аппараатын, өрөспүүбүлүкэ идэлээх министиэристибэлэрин уонна биэдэмистибэлэрин бэрэстэбиитэллэрин кыттыылаах миэстэтигэр тахсан бэрэбиэркэлээһин түмүгүнэн талылынна.

«Энергетик» лааҕыр баазатыгар кыттааччылары, судьуйалары уонна инструктордары анааһын былааннанар. Лааҕыр инфраструктуратыгар олорор куорпустар, 250 миэстэлээх остолобуой, кулууп, мэдиссининэ пууна, административнай дьиэ уонна спортивнай былаһааккалар киирэллэр.

«Маннык халыыптаах күрэхтэһиилэр аан бастаан ыытыллаллар. Биһиги сорукпут — турниры саамай үрдүк таһымҥа тэрийии. Бэлэмнэниигэ боппуруос аҕыйаҕа суох, ол эрээри барыта быһаарыллар кыахтаах. Маннык суолталаах бырайыак, чуолаан Саха сириттэн саҕаланар буолара биһиэхэ дириҥ бэлиэ суолталаах», — диэн Айсен Николаев бэлиэтээтэ.