Дьокуускайга «Сааны байыаннай дьайыыга туттар» аахсыйа салҕанар

«Сааны байыаннай дьайыыга туттар» аахсыйа Илиҥҥи байыаннай уокуругу уонна Росгвардия управлениетын лицензиялыыр-көҥүллүүр үлэтин отделын кытта кыттыһан ыытыллар, диэн Росгвардия Саха сиринээҕи пресс-сулууспата иһитиннэрэр.

Балыктааһын федеральнай ааҕыныстыбатын Илин-Сибиирдээҕи территориальнай управлениетын салайааччытын солбуйааччы Эдуард Алексеевич Родионов дойдубут этэҥҥэ уонна национальнай куттала суох буолуутун хааччыйыыга  аахсыйаҕа кыттыста. Кини байыаннай дьайыы зонатыгар баар байыастарбытыгар көмөҕө бэйэтин кылаатын киллэрдэ. Бас билэр булт саатын, ботуруоннарын, ону тэҥэ сааны-саадаҕы көрөргө-харайарга аналлаах тэриллэри РФ Оборуонаҕа министиэристибэтигэр баҕатынан туттарда.

«Билиҥҥи усулуобуйаҕа судаарыстыба гражданскай уопсастыбалыын бииргэ эрэ кыайар-хотор күүстээх ыҥырыылара бааллар. Дроннары утары байыаннай дьайыы хонуутугар булт саалара көдьүүстээхтэрин көрдөрдүлэр. Уонна хас биирдии туттарыллыбыт саа олоҕу харыстыырга көмөлөһүөҕэ, биһигини Кыайыыга чугаһатыаҕа!» — диэн Эдуард Алексеевич бэлиэтээтэ.