Дьокуускайга саахалланар туруктаах дьиэттэн дьону көһөрүүнү Бастрыкин хонтуруолга ылла

РФ Силиэстийэлиир кэмитиэтин бэрэссэдээтэлэ Александр Бастрыкин Дьокуускайга  саахалланар туруктаах дьиэттэн көһөрүүгэ олохтоохтор бырааптара кэһиллибитин туһунан үҥсүүнэн ыытыллар процессуальнай бэрэбиэркэ түмүгүн дакылааттыырга сорудахтаата.

Бу туһунан Саха сиринээҕи силиэстийэлиир кэмитиэтин пресс-сулууспата иһитиннэрэр. Дьиэттэн көһөрүү уһаабытын туһунан Халтурин уулуссаҕа турар дьиэ олохтоохторо үҥсүү түһэрбиттэр. 1957 сыллаахха тутуллубут дьиэ 2014 сыллаахха саахалланар туруктааҕынан билиниллибит, ол эрээри кэлин бу быһаарыыны көтүрбүттэр.

Олохтоохтор үс сыл тухары быһаарыыны хаттаан көрөргө туруорсубуттар, ол түмүгэр 2017 сыллаахха дьиэ эмиэ саахалланар туруктааҕын ыстаатыһа иҥэриллибит. Ол да буоллар, эбийиэги көһөрүү биир да бырагыраамаҕа киллэрбэтэхтэр. 2024 сыллаахха суутунан саахалланар туруктаах дьиэттэн олохтоохтору сыл аҥаарын иһинэн көһөрөргө эбээһинэстээбит. Билиҥҥэ диэри бу быһаарыы толорулла илик.