Дьокуускайга Гагаринскай уокурукка саамай улахан SMART-поликлиника аһыллыаҕа

Дьокуускайга биир симиэнэҕэ 600 киһини көрүүгэ анаммыт саамай улахан поликлиника Гагаринскай уокурукка судаарыстыбаннай-чааһынай партнерство хайысханан тутуллар.

Өрөспүүбүлүкэ бырабыыталыстыбатын кытта сөбүлэһиинэн «ВИС» бөлөх бүддьүөтү таһынан үбүлээһини тардыыны, бырайыактааһыны, тутууну уонна эбийиэги салгыы тиэхиньиичэскэй өттүнэн  хааччыйар. Бу туһунан Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата иһитиннэрэр.

Билиҥҥи туругунан, саҥа эмтиир тэрилтэ тутуутун бэлэмэ 85%-нан сыаналанар. Тэлгэһэттэн тиэхиньикэ таһаарыллыбыт, тупсаран оҥоруу үлэтэ ыытыллар. Тротуарнай билиитэ номнуо ууруллубут, киирэр-тахсар суоллар оҥоһуллаллар. Инженернэй тэрили: салгылатыы уонна баһаары умуруоруу систиэмэлэрин оҥоруу үлэтэ салҕанар.

Дьиэҕэ лифтэр туруоруллубуттар, бэлэмнэнии үлэлэрэ бараллар. Сылааһынан-уунан хааччыйар ситимэ 100% бэлэм. Дьокуускай саамай улахан поликлиниката быйыл ыарыһахтары көрсөргө бэлэм буолуоҕа. Уопсайа 8856 кв.м. иэннээх, биэс мэндиэмэннээх дьиэҕэ симиэнэҕэ 300 киһини көрөр улахан дьон поликлиниката, 180 киһини көрөр оҕо поликлиниката уонна симиэнэҕэ 120 киһини көрөр дьахтар консультацията баар буолуоҕа.