Хаартыска: ааптар түһэриилэрэ
Дьокуускайга 25-с Федеральнай Сабантуй чэрчитинэн, Национальнай бибилэтиэкэҕэ “Казань” уопсастыбаннай-бэлитиичэскэй, литературнай-уус уран сурунаал 6-с нүөмэрин сүрэхтээтилэр.
Сурунаалы “Казань” кылаабынай эрэдээктэрэ, Татарстан Өрөспүүбүлүкэтин ускуустубатын үтүөлээх диэйэтэлэ, Татарстан Өрөспүүбүлүкэтин уонна Арассыыйа Суруйааччыларын сойуустарын чилиэнэ Альбина Абсалямова билиһиннэрдэ.
Сурунаал 6-с нүөмэрэ Федеральнай Сабантуйу ыытыыга анаммыт. Бу нүөмэр Татарстан Өрөспүүбүлүкэтин салайааччыта (Раис) Рустам Минниханов нууччалыы уонна татаардыы тылынан эппит киирии тылынан саҕаламмыт. Рустам Минниханов: “Быйыл Федеральнай Сабантуй Саха Өрөспүүбүлүкэтигэр ыытыллара кэрэхсэбиллээх. Биһиги култуураларбытыгар уопсай өрүттэрбит элбэхтэр. Ыһыах национальнай бырааһынньыгы сайыннарыыга торумнаммыт үлэни ыыталларын биһиги сөҕөбүт-махтайабыт. Саха сиригэр биир идэлээхтэрбититтэн үөрэнэрбит элбэх!” — диэн тоһоҕолоон эппит.
Ыстатыйалар ааптардара татаар норуотун култууратын, төрүттэрин, үгэстэрин уо.д.а. кэпсээбиттэр. “Сайыҥҥы бырааһынньыктар халандаардара” рубрикаҕа ааҕааччылар саха Ыһыаҕын уонна Арассыыйа атын норуоттарын бырааһынньыктарын туһунан билсиэхтэрин сөп. Сүрүн эрэдээктэр саха норуотун Ыһыаҕын сырдаппыт “Улуусмедиа” суруналыыстарыгар махтанна.
Бүгүҥҥү бырааһынньык ыалдьыттарын уонна кыттыылаахтарын СӨ култуураҕа уонна духуобунай сайдыыга миниистирэ Афанасий Ноев эҕэрдэлээтэ. Кини бу сурунаал 1993 сылтан бэчээттэнэн, саҥа, аныгы Татарстан олоҕун-дьаһаҕын, култууратын, духуобунаһын, литературатын уод.а. сырдатарын тоһоҕолоон бэлиэтээтэ.
СӨ норуодунай бэйиэтэ Наталья Харлампьева Татарстан суруйааччыларын кытары ыкса сибээстээхтик үлэлииллэрин, татаар аныгы поэзиятын уонна прозатын тылбаастаан, Антология бэчээттээбиттэрин, муус устар бүтүүтэ Татарстан суруйааччыларын сийиэһигэр кыттыбыттарын уонна Национальнай бибилэтиэкэҕэ оҕо татаардыы аныгы литературатын антологиятын сүрэхтээбиттэрин туһунан кэпсээтэ. Ону сэргэ бииргэ үлэлэһэр суруйааччыларын туһунан ахтан-санаан ылла. Кинилэр бары Саха сиригэр ыытыллар “Үрүҥ хаар алгыһа” бэстибээлгэ кытталларын, онон литература эйгэтигэр ситим салҕанарын туһунан эттэ. “Сурунаал олус интэриэһинэй уонна наадалаах. Ордук татаардыы тылынан билбэт ааҕааччыларга уонна литератураны, устуоруйаны сэргээччилэргэ”, — диэн махталын тириэртэ.
Сурунаал сүрэхтэниитигэр кэлбит ыалдьыттар Национальнай бибилэтиэкэҕэ татаардыы уонна нууччалыы тылынан тахсыбыт элбэх кинигэни, сурунаалы бэлэхтээтилэр.
Тэрээһиҥҥэ литература эйгэтин, бибилэтиэкэлэр, уопсастыбаннай тэрилтэлэр бэрэстэбиитэллэрэ, Дьокуускай куоракка олорор диаспора уонна Казань устуоруйатын, култууратын уонна аныгы олоҕун кэрэхсиир дьон кэлбиттэр.
ххх
“Казань” сурунаал бастаан икки тылынан: татаардыы уонна нууччалыы бэчээттэммит. Өрөспүүбүлүкэҕэ 14 сурунаал бэчээттэнэриттэн улахан аҥаара — татаардыы тылынан.
Сурунаалы ону таһынан Телеграм-ханаалга, ВКонтакте страницаҕа билсиэххэ сөп уонна, биллэн турар, суруйтаран.
Бүгүн - өрөбүл, онон сынньалаҥҥа, чугас дьону кытта алтыһыыга уонна кэлэр нэдиэлэни былааннааһыҥҥа тоҕоостоох кэм.…
Сайыҥҥы уһун сынньалаҥнар кэннэ үлэ, үөрэх дьыла саҕаланыыта дьиэ кэргэн бүддьүөтүгэр улахан хамсааһын тахсар. Маныаха…
Өлүөхүмэ улууһугар 44 саастаах эр киһи матасыыкылынан айаннаан иһэн сылгыны кытта харсыспыт. Ол түмүгэр суоппар…
Бүгүн Доҕордоһуу болуоссатыгар куорат 393 сылыгар аналлаах Оһуокай үрдүк таһымнаахтык ыытылынна. [gallery ids="241612,241622,241621,241620,241619,241618,241617,241616,241615,241614,241613,241610,241611"] Оруобуна 1…
Дьокуускай куорат күнүн көрсө мээр Евгений Григорьев суруналыыстары мунньан пресс-конференция ыытта. Тэрээһин быйыл күһүн үлэҕэ…
Ханнык баҕарар норуокка инники сайдыыны быһаарар күүһүнэн дойдуларын туһугар күүскэ, бэриниилээхтик үлэлии сылдьар, сайдыы суолун…