Дьокуускайга Саха сирин 2024 сылга бастыҥ иитээччитин быһаарыахтара

Дьокуускай куоракка кулун тутар 26 күнүгэр Үөрэҕи сайыннарыы уонна үрдэтии институтугар «Саха сиригэр сыл бастыҥ иитээччитэ-2024» XV идэтийии куонкуруһун үөрүүлээх аһыллыыта буолла.

Бүтүн Арассыыйатааҕы иитээччилэр куонкурстарын өрөспүүбүлүкэтээҕи түһүмэҕэр 24 улуустан 26 иитээччи кыттыыны ылар. Кыттааччылар орто саастара 37 сыл, уопсай педагогическай ыстаастара 847-ттэн тахса сыл. Кыттааччылар саамай кыра педагогическай ыстаастара – 4 сыл, онтон саамай уһун – 26 сыл.

Куонкуруска 16 иитээччи, 4 музыкальнай салайааччы, физическэй култуура 4 инструктора, 1 педагог-психолог кытталлар. Куонкурус кыайыылааҕа Москва куоракка 2024 сыл күһүнүгэр Бүтүн Арассыыйатааҕы куонкуруска кыттыаҕа.

Санатан эттэххэ, РФ Бэрэсидьиэнэ Владимир Путин оҕо көмүскэлигэр судаарыстыбаннай бэлиитикэни киэҥник тарҕатар сыалтан 2024 сылы – Арассыыйаҕа Дьиэ кэргэн сылынан биллэрбитэ. Оттон Ил Дархан Айсен Николаев Саха Өрөспүүбүлүкэтигэр 2024 сылы – Оҕо сылынан биллэрбитэ диэн СӨ Баһылыгын уонна Бырабыыталыстыбатын пресс-суулуспата иһитиннэрэр.