Дьокуускайга «Саха сирин бастыҥ ювелирнай киэргэллэрэ» быыстапка аһылынна

Саха Өрөспүүбүлүкэтин Көмүс хааһынатыгар бу нэдиэлэҕэ бэлиэтэнэр Ювелирнай уонна алмааһы кырыылыыр бырамыысыланнас үлэһиттэрин күнүн сүрүн тэрээһинэ буолар улахан быыстапка аһылынна.

Сыл аайы ыытыллар бырайыагы Саха Өрөспүүбүлүкэтин Гохрана, «Арктика ювелирдара» ассоциация уонна П.П. Романов аатынан Дьокуускайдааҕы художественнай училище тэрийэллэр. Бу быыстапка киэргэли оҥоруу ускуустубатыгар олохторун анаабыт бастыҥ ювелирнай хампаанньалары, биирдиилээн маастардары уонна устудьуоннары түмэр төрдүс тэрээһин буолар.

«Быыстапка сүрүн сыала – ювелирнай ускуустубаҕа аныгы хайысхалары сайыннарыы, талааннаах маастардары өйөөһүн уонна саха худуоһунньуктарын үрдүк таһымнаах маастарыстыбаларын киэҥ эйгэҕэ билиһиннэрии. Экспозиция ыалдьыттары дизайн саҥа сүүрээннэрин кытта билиһиннэриэҕэ, ону таһынан Саха сирин аныгы ювелирдэрин оскуолатын уратытынан буолар үгэс уонна саҥаны киллэрии дьүөрэлэһиитин көрдөрүөҕэ», – диэн СӨ Үпкэ министиэристибэтигэр иһитиннэрдилэр.

Көрөөччүлэри эрэгийиэн айылҕатын баайын туһанан оҥоһуллубут ювелирнай ускуустуба ураты айымньылара күүтэллэр. Маастардар уонна дизайнердар нарын быһыы, омук матыыптара уонна аныгы технологиялар дьүөрэлэспит кэлиэксийэлэрин көрдөрүөхтэрэ. Эдэр худуоһунньуктар өбүгэ нэһилиэстибэтигэр ураты болҕомтолорун уураллар, үгэстэри саҥалыы толкуйдаан, кэм тыыныгар сөп түбэһэр ураты композициялары айаллар. Быыстапка алтынньы 20 күнүттэн 31 күнүгэр диэри Киров уул., 12 аадырыска үлэлиир. Эрдэттэн сурутуу: https://www.expo-gx.ru саайтка эбэтэр 42-52-90 нүөмэринэн.