Дьокуускайга Сайсары күөлгэ хомус оту ыраастыыллар

Күөлү ыраастааһыны Аан дойдутааҕы Уу күнүн чэрчитинэн СӨ Экология, айылҕаны туһаныы уонна ойуур хаһаайыстыбатын министиэристибэтэ куорат оройуонун дьаһалтатын кытта тэрийдэ.

“Үс погрузчик, тыраахтар уонна сэттэ самосвал үлэлиир. От аһара үүннэҕинэ күөл сытыйбыт бадараанынан бүрүллүөн сөп. Онон хомус оту эрдэттэн ыраастыыр наада”, – диэн өрөспүүбүлүкэ Экологияҕа министиэристибэтэ иһитиннэрдэ.

Сайсары күөл киин куораты тупсарыы генеральнай сайдыытын былааныгар киирбитэ.  Бу былааны олоххо киллэрии чэрчитинэн, 2025 сылга Сайсары күөл кытыыта уонна Ийэ болуоссата тупсарыллыахтара.

«Ытык Сайсары күөл» учаастак эрэгийэннээҕи суолталаах култуурунай нэһилиэстибэ быһыытынан Арассыыйа норуоттарын историческай уонна култуурунай пааматынньыктарын кэлим судаарыстыбаннай реестригэр киирбитэ.