Дьокуускайга саҥа өйдөбүнньүк тутуллуон сөп

Дьокуускай куорат киин искибиэрдэриттэн биирдэстэригэр уран оҥоһуулаах, Саха сирин бэлиэтэ буолар өйдөбүнньүк туруон сөп. Бу туһунан идиэйэ ааптара, «Киэргэ» ювелирнай хампаанньа дириэктэрэ Галина Павлова кэпсээтэ.

— Дьон саҥа кэлбит куораттарыгар бэлиэ сиргэ хаартыскаҕа түһэ сатыыллар. Холобур, Москваҕа — Кириэмил аттыгар, Өймөкөөҥҥө — Тымныы оҕуһун өйдөбүнньүгүн аттыгар. Оттон Дьокуускайга кэлбит туристар ханна түһэллэрий? Оннук бэлиэ сирдээхпит дуо? Элбэх дойдуларга айанныыбын, онон миэхэ бу идиэйэ киирбитэ биэс-хас сыл буолла. Бу санааттан сиэттэрэн, саҥа өйдөбүнньүк эскииһин оҥорбуппут, үрүҥ көмүскэ түһэрэн, куонкуруска кыттыбыппыт.

Саха сирин бэлиэлэрэ туохтарый? Бу — бытарҕан тымныыбыт, алмааспыт уонна түҥ былыргы сэлиибит. Онон үс сэлии үрдүгэр -71 кыраадыстаах тымныыбыт бэлиэтин уонна хаар, дьүкээбил ойууларын оҥоруохха сөп. Оччоҕо манна кэлбит киһи Тымныы полюһун дойдутугар кэлбитин тута өйдүүр. Киһи барыта Өлүөнэ очуостарыгар, Өймөкөөҥҥө тиийэр кыаҕа суох ээ.

Куорат дьаһалтатын кытта кэпсэтэн, ханан туруохтааҕын быһа сабаҕалаан быһаардыбыт. Аны үбүлээһинин булуохпутун наада. Граннарга кыттыахпыт. Бырамыысыланнай тэрилтэлэр эмиэ кыттыһалларын ситиһэ сатыахпыт. Кэргэним Александр Кирилловичтыын ювелирнэй ускуустубаны, муоданы тас дойдуларга сырдатыынан эрэ буолбакка, өссө бырамыысыланнай туризмынан эмиэ дьарыктанабыт. Онон бырамыысыланнай тэрилтэлэр салайааччыларын үксүлэрин билэттиибит, биһиги саҕалааһыммытын өйүөхтэрэ дии саныыбыт.

Хас да миэтэрэ үрдүктээх монумент тимиртэн, Саха сириттэн хостонор таастартан, холобур, чароиттан оҥоһуллуохтаах, дьэрэкээн уоттарынан күлүмүрдүөхтээх. Биһиги худуоһунньуктарбыт бырайыагын оҥоруохтара. Дьон-сэргэ тоҕуоруһа мустар, хаартыскаҕа түһэр сиригэр кубулуйуох этэ дии саныыбын, — диэн кэпсээтэ.

Дьэ чахчы, саҥа саҕалааһын олоххо киирдэҕинэ, Дьокуускайбыт өссө биир кэрэ-бэлиэ сиринэн киэркэйиэх этэ!