Дьокуускайга саҥа төрөөбүт кырачааннары дьиэлэригэр атаарыы үөрүүлээх түгэнэ

Бэҕэһээ, ахсынньы 26 күнүгэр, өрөспүүбүлүкэҕэ Ийэ сылын түмүктүүр тэрээһин чэрчитинэн, Дьокуускайдааҕы килиниичэскэй балыыһа Перинатальнай киинигэр саҥа төрөөбүт оҕолору балыыһаттан таһаарыы үөрүүлээх түгэнэ буолла.

Барыта тоҕус кырачаан: 2 уол уонна 7 кыыс балыыһаттан таҕыста.

СӨ Үлэҕэ уонна социальнай сайдыыга миниистирин солбуйааччы Афанасий Постников оҕоломмут ийэлэри уонна саҥа төрөөбүт кырачааннары эҕэрдэлээн, истиҥ-иһирэх тыллары эттэ. Ону таһынан 100 тыһ. солк. суумалаах «Үйэ оҕолоро» тус сыаллаах хапытаал сэртипикээтин туттарда итиэннэ Саха АССР 100 сыллаах үбүлүөйүн ураты бэлиэтин быһыытынан, үрүҥ көмүс «погремушка» оонньууру бэлэхтээтэ.

Санатан эттэххэ, Ил Дархан Айсен Николаев тус сыаллаах хапытаалы чугастааҕы биэс сылга уһатарын биллэрбитэ. Бу чугастааҕы биэс сылга оҕолонор саастаах дьахталлар ахсааннара 90-с сыллардааҕы демографическай дьаама сабыдыалынан, аҕыйыыр туруктааҕынан, билиҥҥи кэмҥэ дьоһун суолталаах дьаһал буоларын бэлиэтиир тоҕоостоох. Өрөспүүбүлүкэҕэ бүгүҥҥү туругунан 11292 оҕо, ол иһигэр 5812 уол уонна 5480 кыыс төрөөтө.